Եթե Հայաստանը առաջիկա օրերին վավերացնի ՀՀ-ԵՄ համաձայնագիրը, հունիսի 1-ից այն արդեն պայմանական կարգով ուժի մեջ. Սվիտալսկի
Եթե Հայաստանը առաջիկա օրերին վավերացնի Հայաստան-ԵՄ համաձայնագիրը, հունիսի 1-ից այն արդեն պայմանական կարգով ուժի մեջ կմտնի: Այդ մասին «Ազատություն» ռադիոկայանին տված հարցազրույցում ասել է Հայաստանում Եվրամիության դեսպան Պյոտր Սվիտալսկին : Հարցին, թե համաձայնագրի ժամանակացույցով այժմ քայլերի ի՞նչ հերթականություն է լինելու, Սվիտալսկին պատասխանել է. «Ամենաառաջին խնդիրը այդ համաձայնագրի ուժի մեջ մտնելուն ուղղված քայլերի իրականացումն է: Հաջորդ շաբաթ Հայաստանի Ազգային ժողովը լսումներ է անցկացնելու, որին, հավանաբար, կհետևի նաև քվեարկություն ՀՀ-ԵՄ Համապարփակ և ընդլայնված գործընկերության համաձայնագրի շուրջ, և դա շատ կարևոր է, որովհետև Հայաստանի կողմից համաձայնագրի վավերացումից հետո մենք կարող ենք արդեն մտածել արդեն համաձայնագրի՝ պայմանական ուժի մեջ մտնելու մասին: Եթե Հայաստանը արդեն այժմ՝ առաջիկա օրերին, վավերացնի համաձայնագիրը, մենք կարող ենք ակնկալել, որ հունիսի 1-ից այն արդեն պայմանական կարգով ուժի մեջ կմտնի»: Նրա խոսքով, միևնույն ժամանակ, Եվրամիության կողմից վավերացման գործընթացը կշարունակվի: «Ինչպես գիտեք, համաձայնագիրն առաջինը վավերացրել է Էստոնիան: Բացի այդ, գիտենք, որ այլ երկրներում դրա վավերացման գործընթացը մեկնարկել է: Այնպես որ, ԵՄ կողմից վավերացման գործընթացը կշարունակվի յուրաքանչյուր պետության օրենսդրությանը համապատասխան կարգով: Մենք ակնկալում ենք, որ մայիսի կեսերին քննարկումներ կանցկացվեն Եվրոպական խորհրդարանում, և խորհրդարանը իր աջակցությունը կհայտնի համաձայնագրին՝ ընդունելով ոչ օրենսդրական վճիռ»,- նշել է նա՝ մանրամասնելով, որ այս հարցում Եվրոպական խորհրդարանի վճիռը կոչվում է ոչ օրենսդրական, այսինքն՝ դա իրավական ուժ չունի, սակայն քաղաքական առումով շատ կարևոր է. «Մենք հուսով ենք, որ բոլոր այս կարևոր որոշումները ժամանակին կընդունվեն, և մենք հունիսի 1-ից հնարավորություն կունենանք կիրառել համաձայնագրի դրույթները՝ պայմանական կարգով»: ԵՄ դեսպանի նշել է, թե ընդունելովԵՄ կարգավորումները՝ Հայաստանը կարող է արդիականացնել իր տնտեսությունը և արդիականացնել կենսագործունեության տարբեր ոլորտները: «Դրանցում կան շատ կարևոր բաղադրիչներ, օրինակ՝ սպառողների իրավունքների պաշտպանությունը, սննդի անվտանգությունը, պետական գնումները և այլն: «Երբ ուսումնասիրում ենք համաձայնագրի հավելվածները, դրանց մեջ որոշ դեպքերում շատ կոնկրետ ժամկետներ են սահմանվում կարգավորումների իրականացման համար: Իհարկե, որոշ դեպքերում ավելի ճկուն մոտեցում է ցուցաբերվում, բայց մեր հայ գործընկերների հետ քննարկումներից մենք եզրակացրել ենք, որ նրանք լրջորեն և մանրակրկիտ կերպով ուսումնասիրում են սա իրականացնելու հնարավորությունները»,- ասել է նա:
Հետևեք մեզ Viber-ում
