Կալանավորված փաստաբանին ազատ արձակեցին

Առանձնապես խոշոր չափերով կաշառքի միջնորդության մեջ մեղադրվող փաստաբան Գայանե Գալոյանի նկատմամբ ընտրված խափանման միջոց կալանավորումը փոփոխվեց: Երևան քաղաքի ընդհանուր իրավասության դատարանը՝ դատավոր Մեսրոպ Մակյանի նախագահությամբ, բավարարեց փաստաբան Գայանե Գալոյանի պաշտպան Անժելա Հոբոսյանի միջնորդությունը: Գայանե Գալոյանը կալանքից գրավով ազատ արձակվեց, իսկ որպես գրավի չափ՝ դատարանը սահմանեց 700 000 ՀՀ դրամ: Այսպիսով, ըստ Գայանե Գալոյանին առաջադրված մեղադրանքի՝ նա օժանդակել է Սոս Գասպարյանի օգտին իրենց լիազորությունների շրջանակում գործողություններ կատարելու դիմաց նախնական համաձայնությամբ առանձնապես խոշոր չափերով կաշառք ստացող վերը նշված քննչական բաժնի ավագ քննիչ Միքայել Զադոյանին և նույն բաժնի պետի տեղակալ Բունիաթ Եղիազարյանին: Խոսքը գնում է 3000 ԱՄՆ դոլար կաշառքի մասին: Ներկայացված միջնորդությանն առարկել էր դատախազ Մնացականյանը գտնելով, որ շարունակում է առկա լինել Գալոյանին կալանքի տակ պահելու հիմքերը: Մասնավորապես, հիմնավոր կասկած է առկա, որ Գայանե Գալոյանն առնչություն ունի իրեն մեղսագրվող հանցագործությանը, ինչպես նաև վերջինիս կողմից ՀՀ քրեական դատավարության 135-րդ հոդվածի 2-րդ մասով նախատեսված այն հիմքը, որ Գալոյանն ազատության մեջ գտնվելով կարող է դիմել փախուստի: Բացի այդ դատախազը համակարծիք չէր պաշտպանի այն ձևակերպմանը, որ ներկա պահին ապացույցների մի որոշ մասի հետազոտված լինելու պարագայում վերացել է վտանգը, որ Գալոյանը կարող է խոչընդոտել գործով դատաքննությանը: Ուստիև դատախազը խնդրեց միջնորդությունը մերժել: Միջնորդությանը միացավ գործով մյուս ամբաստանյալների պաշտպանները: Այսպիսով դատարանը բավարարեց Գայանե Գալոյանի պաշտպանի միջնորդությունը: