Նարեկացու արձանը կդառնա աշխարհի բոլոր քրիստոնյաների սիրելի հուշակոթողը.դեսպան
Մեծ պատիվ եւ պատասխանատվություն է Վատիկանում Գրիգոր Նարեկացու արձանի բացման արարողության մասնակցելն ու այն աշխարհին ներկայացնելը: Այս մասին Facebook-ի իր էջում գրել է Միքայել Մինասյանը՝ նշելով, որ Վատիկանում Գրիգոր Նարեկացու արձանի բացման օրն «իսկապես պատմական էր, զգացողություններն ու տպավորությունները՝ անմեկնելի»: «Օրերն ու իրադարձությունները մոռացվելու հատկություն ունեն, մի օր չենք լինի եւ մենք՝ մեզ հետ տանելով մեր հիշողությունները, բայց Գրիգոր Նարեկացու՝ Վատիկանի այգիներում տեղադրված արձանը հավերժ կմնա սերունդներին: Նարեկացու բրոնզաձույլ արձանը Հայաստանի մի մասնիկն է Սուրբ Աթոռում: Արձանի վրա պատկերված է աստվածային գիրքը՝ «Նարեկը»: Արձանի դիմացի մասում հրեշտակն ու նռնենին է, ետնամասում կտուցով խաղաղություն բերող աղավնին` Նարեկացու աղավնին: Հեղինակը՝ Դավիթ Երեւանցին, ցանկացել է, որ Նարեկացու արձանը կամուրջ դառնա երկնքի ու երկրի միջեւ եւ փայլուն կերպով իրականացրել է գաղափարը: Արձանը բացելն ու այն աշխարհին ներկայացնելն ինձ համար մեծ պատիվ եւ պատասխանատվություն էր»,- գրել է դեսպանը: Միքայել Մինասյանն հավատում է, որ Նարեկացու արձանը կդառնա աշխարհի բոլոր քրիստոնյաների սիրելի հուշակոթողը: «Ի սրտե շնորհակալ եմ բոլորին, ովքեր ֆիզիկապես ու հոգեպես մեր կողքին էին այս պատմական իրողության կայացման ընթացքում»,- եզրափակել է նա:
Հետևեք մեզ Viber-ում
