Նախագահը խոստացել է ջանք չխնայել

«Հայաստանի արտաքին քաղաքականության գլխավոր ուղղություններից մեկը եղել է համագործակցությունն արաբական երկրների հետ:  Մենք կարողացել ենք բարիդրացիական, փոխադարձ շահավետ համագործակցություն հաստատել Միացյալ Արաբական Էմիրությունների, ինչպես նաև տարածաշրջանի մյուս երկրների հետ՝ հենվելով մեր պատմական հարուստ հարաբերությունների վրա: Պետք է օգուտ քաղել այս լավ հարաբերություններից և դրանք փոխադրել տնտեսական համագործակցության»,-  այս մասին Արաբական Միացյալ Էմիրություններում հրատարակվող, Միջին Արևելքի և Ծոցի երկրներում տարածվող անգլալեզու Gulf News օրաթերթի և «Global FDI reports» գործակալության համատեղ հատուկ՝ Հայաստանին նվիրված համարում թողարկված հարցազրույցում ասել է ՀՀ Նախագահ Սերժ Սարգսյանը: Նա հիշեցրել է 2017 թվականին Աբու Դաբիում կազմակերպված բիզնես ֆորումը՝ նշելով, որ դա 2016 թվականին ԱՄԷ կատարած իր պաշտոնական այցի քննարկումների շարունակությունն էր: Սերժ Սարգսյանն ընդգծել է, որ 2017 թվականին Հայաստանն առանց մուտքի արտոնագրի ռեժիմ է հաստատել ԱՄԷ քաղաքացիների և այնտեղ բնակության իրավունք ունեցողների համար: «Բացի այդ, մենք նոր համաձայնագիր ենք ստորագրել՝ քաջալերելու և պաշտպանելու ներդրումները: Այս ընթացքում շատ ձեռներեցներ փոխադարձ այցեր են կատարել՝ Էմիրություններից Հայաստան և Հայաստանից ԱՄԷ: 2017 թվականի արդյունքն այն էր, որ մեր առևտրաշրջանառությունը գերազանցեց 200 մլն ԱՄՆ դոլարը: Հավատացած եմ, որ սա միայն մի փոքր մասն է՝ 15-20 տոկոսն է հսկայական չօգտագործված ներուժի, որը կա տնտեսական համագործակցության համար: Հետևաբար, մենք շարունակելու ենք ավելի մերձենալ և չխնայել որևէ ջանք ԱՄԷ հետ մեր հարաբերությունները հնարավոր բոլոր ոլորտներում ամրապնդելու համար»,- ասել է Նախագահ Սարգսյանը: