Աշտարակում վիճաբանել և դանակահարել են Օշական գյուղի Սուրբ Մեսրոպ Մաշտոց եղեկեցու հոգևոր հովվին

Երեկ՝ ապրիլի 4-ին, արտակարգ դեպք է տեղի ունեցել Արագածոտնի մարզում: Ժամը 15:00-ի սահմաններում Աշտարակ քաղաքի Ներսես Աշտարակեցու հրապարակում՝ «Ինեկո բանկ» ՓԲԸ-ի մասնաշենքի դիմաց, անհայտ անձը վիճաբանել, ապա ձեռքին եղած դանակով սպառնացել է, որ կսպանի ու դանակով հարվածել է Օշական գյուղի բնակիչ, 36-ամյա Հմայակ Մանուկյանի ճակատին՝ պատճառելով վնասվածք , որից հետո դիմել է փախուստի: Shamshyan.com-ի փոխանցմամբ՝  ոստիկանության Աշտարակի բաժնի ծառայողները, ձեռնարկելով անհրաժեշտ օպերատիվ-հետախուզական միջոցառումներ, պարզել են, որ Հ. Մանուկյանի հետ վիճաբանել ու մարմնական վնասվածքը պատճառել է Աշտարակ քաղաքի բնակիչ, 46-ամյա Աշոտ Մաթևոսյանը, ով ժամեր անց ոստիկանների կողմից հայտնաբերվել և բերման է ենթարկվել ոստիկանության Աշտարակի բաժին: Նրա մոտ հայտնաբերվել է դանակը, որով նա վնասվածք է պատճառել Հ. Մանուկյանին: Նախնական տվյալներով Հ. Մանուկյանն Օշական գյուղի Սուրբ Մեսրոպ Մաշտոց եկեղեցու հոգևոր հովիվն է: Փաստի առթիվ ոստիկանության Աշտարակի բաժնի հետաքննչական բաժանմունքում նյութեր են նախապատրաստվում: Ա. Մաթևոսյանը ստորագրությամբ բաց է թողնվել: