«Պարոն Տոնոյան, ուշադիր կլինեք».վարչապետը՝ «Բուրգեր Քինգ»-ի պայթյունի մասին
« Երեւանի կենտրոնում տեղակայված հանրային սննդի օբյեկտում տեղի ունեցած պայթյունի հետեւանքով տուժեց 8 մարդ: Հարուցվել է քրեական գործ, ինչպես նաեւ գործադիր մարմինները, ըստ ցուցումների կատարում են անհրաժեշտ աշխատանքները: Միաժամանակ, նշված դեպքը հրդեհային եւ տեխնիկական անվտանգության նորմատիվային պահանջների նկատմամբ պետական հսկողության խստացման հիմք է հանդիսանում»,-ՀՀ կառավարության նիստում, վարչապետ Կարեն Կարապետյանն անդրադարձավ տեխնիկական անվտանգության պահանջների պահպանման խնդրին, մասնավորապես, «Բուրգեր Քինգ» սրճարանում տեղի ունեցած պայթյունին:
Երկամսյա ժամկետում ձեռնարկել միջոցներ արտադրական վտանգավոր օբյեկտների, ինչպես նաեւ հանրային սննդի օբյեկտների սպասարկման եւ ծառայությունների մատուցման ոլորտումգործող այլ կազմակերպությունների կողմից հրդեհային եւ տեխնիկական անվտանգության նորմատիվային պահանջների պահպանման, ինչպես նաեւ թերությունների հայտնաբերման ուղղությամբ,հանձնարարեց վարչապետը ԱԻ նախարարին: «Խախտումների արձանագրման դեպքերում սահմանելով սեղմ ժամկետներ խնդիրները վերացնելու իսկ դրանք չկատարելու դեպքում կիրառել օրենքով սահմանված պատասխանատվության խիստ միջոցներ: Համապատասխան կազմակերպություններում աշխատանքի ապահովման հարցերում ներգրավել առողջապահական տեսչական մարմնին: Առաջարկում եմ գործարար միջավայրի ներկայացուցիչներին, սպասարկման եւ ծառայությունների մատուցման ոլորտում գործող կազմակերպությունների ղեկավարներին սեփական նախաձեռնությամբ, ինչպես նաեւ համագործակցելով ԱԻՆ ներկայացուցիչների հետ, միջոցներ ձեռնարկել հնարավոր խնդիրների վեր հանման եւ վերացման ուղղությամբ՝ բարձրացնելով համապատասխան օբյեկտներում տեխնիկական անվտանգության պայմանները»,-նշեց Կարեն Կարապետյանը: Նա ԱԻՆ եւ Տնտեսական զարգացման եւ ներդրումների նախարարներին հանձնարարեց երկամսյա ժամկետում մշակել եւ կառավարության աշխատակազմ ներկայացնել տեխնիկական անվտանգության ոլորտում հսկողական մեխանիզմների կատարելագործման, ոչ ամբողջական օրենսդրական կարգավորումների հստակեցման ԵՏՄ շրջանակներում ընդունված տեխնիկական կանոնակարգերի ներդրման , ինչպես նաեւ գործնականում առկա խնդիրների վերացմանն ուղղված աշխատանքների վերաբերյալ առաջարկություններ: «Պարոն Տոնոյան, ուշադիր կլինեք, որպեսզի այս հանձնարարականի հետեւանքով չունենանք ադմինիստրատիվ պրոբլեմներ եւ լիազորությունների ոչ ճիշտ ընկալում եւ կիրառում»,-ասաց վարչապետը:
Հետևեք մեզ Viber-ում
