Էրդողանն այցելել է երկրի հարավային՝ անմիջապես Սիրիային սահմանակից Հաթայ նահանգ

Ապրիլի 1-ին Թուրքիայի նախագահ Ռեջեփ Թայիփ Էրդողանն այցելել է երկրի հարավային՝ անմիջապես Սիրիային սահմանակից Հաթայ նահանգ: Էրդողանը եղել է թուրք-սիրիական սահմանին տեղակայված ստորաբաժանումներում: Այս մասին հայտնում է թուրքական պետական «Անադոլու» գործակալությունը: Միեւնույն ժամանակ, Հաթայ նահանգի ստորաբաժանումներում, զորամասերում ստուգայցեր է կատարել Թուրքիայի ԶՈւ գլխավոր շտաբի պետ Հուլուսի Աքարը: Նրան ուղեկցել են նաեւ ցամաքային զորքերի հրամանատար Յաշար Գյուլերը, ռազմաօդային ուժերի հրամանատար Հասան Քյուչյուքաքյուզը եւ 2-րդ բանակի հրամանատար Իսմայիլ Մեթին Թեմելը: Հայտնում է Թուրքիայի ԶՈւ ԳՇ կայքը, գրում է Ռազմինֆոն: Մարտի 31-ին ԶՈւ հրամանատարությունը եղել է նաեւ Թուրքիայի Էլազիգ, Թունջելի եւ Մալաթիա նահանգի ստորաբաժանումներում: Նշենք, որ Թուրքիայի զինուժը շարունակում է Սիրիայի քրդական «Ժողովրդական ինքնապաշտպանության ջոկատների»՝ YPG-ի դեմ գործողությունները Աֆրին շրջանում: Մարտի 18-ին թուրքական կողմը գրավել է Աֆրին քաղաքի կենտրոնը: Տեղեկություններ կան նաեւ, որ Թուրքիայի բանակը եւ նրանց աջակցող զինյալները մտել են Թել Ռիֆաթ, սակայն սա դեռեւս հաստատված տեղեկություն չէ: Թուրքիայի ուժայինները միեւնույն ժամանակ շարունակում են ռազմական գործողությունները «Քրդստանի աշխատավորական կուսակցության» (PKK) զինյալների դեմ երկրի արեւելքում եւ հարավ-արեւելքում: Թուրք-քրդական բախումները վերսկսել են դեռեւս 2015-ի ամռանից: