Բալիստիկ հրթիռներ՝ հայ-թուրքական սահմանի՞ն

Թուրքիան Սինոպ նահանգի ռազմական փորձարարական գոտում անցկացրել է սեփական արտադրության առաջին բալիստիկ հրթիռների փորձարկումը: Խոսքը Gokdogan միջին և փոքր հեռահարության և Bozdogan մեծ հեռահարության հրթիռների մասին է: Նշվում է, որ փորձնական արձակումների ժամանակ մասնագետներին հաջողվել է գնահատել հրթիռի շարժիչի հնարավորությունն ուղղորդող համակարգի անջատումից հետո: 2018-ի վերջին եռամսյակում նախատեսվում է նաև հրթիռի արձակում իրականացնել շարժվող թիրախների խոցման համար նախատեսված ցամաքային սարքից և ինքնաթիռից: Թուրքիայի Գիտատեխնիկական հետազոտությունների հարցերով խորհրդի և Ռազմական արդյունաբերության գիտա-հետազոտական ինստիտուտի համատեղ մշակման Gokdogan և Bozdogan հրթիռներն առաջին անգամ ներկայացվել են 2017 թվականին: Դրանց մշակման ծրագիրը նախատեսվում է ավարտել 2020-ին, որից հետո սերիական արտադրություն կսկսվի: Միաժամանակ, Ադրբեջանը «կամիկաձե» անօդաչու թռչող սարքեր է մշակում: “Science and Technology Park” ընկերությունը, որի գրասենյակը գտնվում է Ադրբեջանի ԳԱԱ բարձր տեխնոլոգիաների պարկում, ռազմամթերքի երեք նախատիպ է մշակել։ Նրանցից մեկը՝ «Mini» անվան տակ, գտնվում է դեռևս փորձարկման փուլում։ Նրա զանգվածը 3,5 կիլոգրամ է, թռիչքի տևողությունը՝ 30 րոպե, մարտագլխիկի զանգվածը՝ 0,5-0,7 կգ։ Հարվածի շառավիղը՝ 5-7 կմ։ Երկրորդ նախատիպն ավելի ծանր է՝ մոտ 5 կգ։ Նա նման է իսրայելական Harop բարաժող ռազմամթերքի փոքրացված պատճենին։ Հարվածի շառավիղը՝ 10 կմ է։ Էլեկտրաշարժիչ է օգտագործվում։ Երրորդը՝ «Grand»-ն է՝ 12-15 կգ. ծավալով, թռիչքի տևողությունը 3 ժամ, հարվածի շառավիղը՝ մինչև 20 կմ։ Օգտագործում է ներքին այրման շարժիչ։ Թուրքիան ու Ադրբեջանը տարածաշրջանում ռազմական հզորության ուղղությամբ են աշխատանքներ տանում: Նոր զինատեսակների արտադրություն, ուժի ցուցադրություն, սա է Անկարայի ու Բաքվի թիվ մեկ նպատակը: Ադրբեջանի պաշտպանության նախարար, գեներալ-գնդապետ Զաքիր Հասանովը մարտի 31-ին Թուրքիայի Գիրեսուն քաղաքում կմասնակցի Ադրբեջանի, Թուրքիայի և Վրաստանի պաշտպանության նախարարների եռակողմ հանդիպմանը։ Այս մասին ասվում է Ադրբեջանի ՊՆ մամլո հաղորդագրությունում։ Զաքիր Հասանովը մարտի 28-ին պաշտոնական այցով Անկարա կմեկնի։ Այցի շրջանակում Հասանովը կհանդիպի Թուրքիայի ռազմա-քաղաքական և այլ կառույցների ղեկավարների հետ։ Թուրքիան ու Ադրբեջանը ծրագրում են իրենց հարևաններին ապացուցել, որ ցանկացած պահի կարող են «հարցերը լուծել» զենքով: Եթե Թուրքիայի դեպքում այդ քաղաքականությունն արդեն գործողության մեջ է, ապա Ադրբեջանին առայժմ զսպում են միջնորդ պետությունները: Մետաքսյա Շալունց