Ահազանգը տեղ հասավ. թոշակները վերականգնեցին

Աամիսներ առաջ մեր խմբագրություն ահազանգ էինք ստացել, որ Կառավարությունը որոշել է ֆիզմաթ թեքումով ավագ դպրոցների գերազանց եւ օլիմպիական առաջադիմությամբ աշակերտների  թոշակը կրճատել, այսինքն նրանց զրկել 3700-3900 դրամներից, նրանց թիվը, ընդ որում, խիստ սահմանափակ է, ընդհանուր թվով մոտ հարյուր երեխա: Այս առիթով ԵՊՀ դասախոս Նարինե Դիլբարյանը hayeli.am-ի հետ զրույցում ասել էր. <<Մենք  պարբերաբար քննարկում ենք գիտության եւ կրթության հայեցակարգեր, լսում ենք, որ մեր ապագան կրթված սերունդն է, այն Հայաստանն է, որը բարձր տեխնոլոգիաներով է առաջնորդվում եւ կարող է մրցակից լինել պետություններին ոչ թե օգտակար հանածոներով, որոնք գոյություն չունեն, այլ իր մարդկային պոտենցիալով: Բայց ցավալին մնում է այն իրականությունը, որ չգիտես ինչու միշտ տնտեսում են կրթության ու գիտության ոլորտի առանց այն էլ քիչ հատկացվող գումարները: Սա մտահոգիչ ահազանգ է, որ աշակերտներին զրկել են այդ գումարներից:  Ընդ որում այդ գումարները տրվում են հաշվված մարդկանց, դպրոցներում մոտ 100 աշակերտի, դա ինքնին մեծ գումար չէ, բայց բարձր դասարանի աշակերտների համար լրացուցիչ խթան է, վերաբերմունք: Միշտ կարելի է հասկանալ, թե ինչու է պետությունը քիչ վճարում, ինչու բյուջեի խնայողությունները միշտ չեն բավարարում:Բայց երբ ընդհանրապես կտրում ես երեխաների գումարը, թոշակը, ուսոցիչների, դասախոսների աշխատավարձեր են կրճատվում եւ տպավորություն է ստեղծվում, թե կրթության ոլորտը պետք է զարգանա մերկ խանդավառության վրա,որը բացարձակ անհնար է: Չֆինանսավորել որեւէ ոլորտ եւ ակնկալիք ունենալ, որ այն առաջընթաց կունենա, պարզապես ծիծաղելի է: Կառավարության այս՝ ամեն տեղից հավաքելու մոլուցքը եւ հավաքել ամենախոցելի խավից, ուղղակի ապշեցնում է>> : Այս ահազանգից հետո ֆիզմաթ թեքումով ավագ դպրոցների գերազանց եւ օլիմպիական առաջադիմությամբ աշակերտների  թոշակը վերականգնվել է և նրանք ստացել են երեք ամսվա իրենց հասանելի գումարը: