«Կա մտավախություն. գուցե մենք ունենանք Սևաստոպոլի օրինակը». Գևորգ Մելիքյան (ՄԱՀՀԻ փորձագետ) (video)

Այսօր լրագրողների հետ հանդիպմանը ՄԱՀՀԻ փորձագետ Գևորգ Մելիքյանը, խոսելով ռուսական ռազմական ոստիկանության ստորաբաժանման ստեղծումից, նշեց, որ կարևոր է հասկանալ, թե ու՞մն է նախաձեռնությունը. «Հայկական կո՞ղմն է դիմել ռուսական կողմին, թե՞ հակառակը, ինչի՞ց է գալիս սրա անհրաժեշտությունը, արդյոք հնարավոր չէր փորձել համատեղ գործել և չունենալ առանձին զորամիավորում»: Գևորգ Մելիքյանը նշում է, որ Հայաստանը պատեհ և անպատեհ առիթով դրսում քննադատվում է. «Քննադատողները նշում են, որ անվտանգային, տնտեսական հարցերում Հայաստանը դարձել է Ռուսաստանի արբանյակը: Մասնավորապես՝ Իրանը, բանակցային գործընթացում Հայաստանի հետևում միշտ տեսնում է Մոսկվային, հասկանալով, որ այս գործընթացում Ռուսաստանի կանաչ լույսը պետք է տեսանելի լինի»: Փորձագետը, զուգահեռներ անցկացնելով Սևաստոպոլի հետ, իր մտահոգությունն արտահայտեց. «Ընդլայնելով ռուսական ռազմական ներկայությունը Հայաստանում, հատկապես Գյումրիում, արդյոք մենք չենք գա մի կետի, որտեղ մենք կունենանք այն, ինչ տեղի ունեցավ Սևաստոպոլում»: Առավել մանրամասն՝ տեսանյութում.