Գունավոր ընտրություն. կասկածի տակ է դրվում լեգիտիմ իշխանության ձևավորումը

Ընտրական օրենսգրքի ներկայիս տարբերակի ընդունվելու դեպքում «համապետական շիլաշփոթ» է սպասվում: Այսօր հրավիրված ասուլիսի ժամանակ նման տեսակետ հայտնեց փաստաբան Նորայր Նորիկյանը: «Այս նախագծում վիճահարույց դրույթներ կան, որոնք կասկածի տակ կարող են դնել լեգիտիմ իշխանության ձեւավորումը: Կարծիքը, թե մենք անցում ենք կատարում հարյուր տոկոսանոց համամասնական ընտրակարգին, իրականությանը չի համապատասխանում. մեծամասնականը ոչ թե իր տեղն է զիջել, այն անվանումն է փոխվել»,- նշեց  Նորայր Նորիկյանը: Նորիկյանը մատնանշում է նաև կոնկրետ իրավիճակ. «80 տարեկան պապի, որին դրսում հրահանգավորելու են , եւ ոչ միայն պապիկին, այլ նաեւ 100 հազարավոր ընտրողների, որ կմտնես եւ կընտրես կանաչ կամ կարմիր գույնը: Այսինքն՝ ընտրական բուն մեխանիզմը եւ պատկերացումները արժեզրկվում են, եւ մարդիկ ընտրության են գնալու գունային պատկերացումներից ելնելով»,-նշում է փաստաբանը: Փաստաբանի կարծիքով՝ հատկապես 67-րդ հոդվածն է խնդրահարույց, երբ առաջին անգամ Հայաստանում «գունավոր ընտրություն» է իրականացվելու. ընտրողը պետք է ընտրի այս կամ այն գույնի քվեաթերթիկը, որը վերաբերում է կոնկրետ կուսակցության. «Նույն հոդվածով էլ որ կուսակցությանն ընտրում է քաղաքացին, այդ կուսակցությունից էլ թեկնածուի պետք է ընտրի: Սա նշանակում է, որ եթե ՀՀԿ-ին ես ձայն տալիս, ապա չես կարող այլ կուսակցության ներկայացուցչի օգտին քվեարկել»: Նորայր Նորիկյանի կարծիքով՝ մտահոգիչ է նաեւ 31-րդ հոդվածի 5-րդ կետը, որի համաձայն՝ հանձնաժողովի նախագահը կարող է հեռացնել վստահված անձանց, դիտորդներին եւ ԶԼՄ ներկայացուցիչներին: Փաստաբանը հորդորեց պայքարել, որ այս դրույթը հանվի: «Թե տեղական, թե միջազգային հասարակական կազմակերպությունները կարող են ընտրությունների ժամանակ դիտորդական առաքելություն իրականացնել, եթե ունեն ՀՀ նախագահի, ԱԺ նախագահի, վարչապետի կամ ԿԸՀ նախագահի լիազորագիրը: Սա նշանակում է, որ դիտորդական առաքելություն կիրականացնեն այն անձինք, որոնք հաճո են ՀՀ իշխանություններին»,- հավելեց Նորիկյանը: Նշենք, որ Ընտրական օրենսգրքի նախագիծն արդեն դրվել է շրջանառության մեջ: Հաջորդ շաբաթ արդեն իսկ սպասվում են խորհրդարանական լսումներ: Օրենսգիրքը պետք է ընդունվի մինչեւ հունիսի 1-ը: Աստղիկ Ավագյան