Մենք ոչ մի բան չգիտենք. 9-ամյա դստեր հետ ինքնասպան եղած կնոջ մայրը՝ գործի ընթացքի մասին

Հայկական ժամանակը գրում է. Արդեն մեկ ամիս է անցել Դավթաշենի կամրջից մոր եւ դստեր նետվելու դեպքից, սակայն շատ հարցեր դեռ մնացել են անպատասխան: Թե ինչն է դրդել Գայանե Հարությունյանին դստեր հետ նետվել կամրջից, դեռ հայտնի չէ, մեկ ամիս անց դեռ դեպքի շարժառիթը չի պարզվել: Գայանե Հարությունյանի մայրը՝ տիկին Ալեքսնադրան մեր զրույցում չցանկացավ խոսել գործի քննության ընթացքի մասին: «Մենք դեռ չգիտենք ոչ ընթացքը..., ոչ մի բան»,- այսքանով եզրափակեց իր խոսքը տիկին Ալեքսնադրան՝ միաժամանակ տեղեկացնելով, որ չի ցանկանում զրուցել լրագրողների հետ: Դավթաշենի կամրջից փետրվարի 15-ին դստեր հետ ինքնասպանություն գործած Գայանե Հարությունյանի նկատմամբ նշանակվել է հետմահու դատահոգեբանական փորձաքննություն։ Փորձագետին հարցեր են առաջադրվել՝ պարզելու դեպքին նախորդած ժամանակահատվածում երիտասարդ կնոջ հոգեբանական վիճակը։ Արդյո՞ք նրա հոգեբանական վիճակը կարող էր նրան դրդել ինքնասպանության, թե՞՝ ոչ, եթե՝ այո, ապա որո՞նք են այդ վիճակի զարգացման պատճառները: ՀՀ քննչական կոմիտեի նախագահի խորհրդական Սոնա Տռուզյանը մեր զրույցում ասաց, որ նշանակված փորձաքննության եզրակացությունը դեռ չի ստացվել: Նա ասաց, որ քրեական գործի շրջանակում հարցաքննվել են բազմաթիվ անձինք, քննություն է տարվում պարզելու շարժառիթը: Դեպքի առթիվ հարուցվել է քրեական գործ՝ ՀՀ քրեական օրենսգրքի 104-րդ հոդվածի 1-ին (դիտավորյալ սպանություն) մասով եւ 110-րդ հոդվածի 1-ին մասով (ինքնասպանության հասցնելը)։ Մանրամասն՝ armtimes.com-ում