Ասյա Խաչատրյանի իրարանցումը. դիմումն ուղարկվել է ոստիկանության ԿՀԴՊՎ

Հայաստանի Գլխավոր դատախազությունից Aysor.am-ին հասատատում են, որ Ասյա Խաչատրյանը համապատասխան դիմում է ներկայացրել ՀՀ դատախազություն: «Դիմումն ուղարկվել է ՀՀ ոստիկանության կազմակերպված հանցավորության դեմ պայքարի գլխավոր վարչություն՝ դրանում ներկայացված հանգամանքներն ստուգելու նպատակով», – Aysor.am-ին տեղեկացրեց Գլխավոր դատախազի մամուլի խոսնակ Գոռ Աբրահամյանը: Ավելի վաղ, իր հարցազրույցում Ասյա Խաչատրյանը հայտարարել էր, որ Ստեփանակերտում Արցախի ոստիկանության ծառայողները իրեն ծեծի են ենթարկել։ Արցախի ոստիկանության լրատվական ծառայությունից Aysor.am-ին դեպքի հետ կապված որևէ մեկնաբանություն չէին տվել՝ ասելով, որ Հայաստանի իրավապահները քննում են հաղորդումը և այդ մասին կխոսեն ավելի ուշ։ Կատարվածին անդրադարձել էր Արցախի մարդու իրավունքների պաշտպանը և տեղեկացրել, որ սեփական նախաձեռնությամբ քննարկման ընթացակարգ սկսելու մասին որոշում է կայացրել։ «Եթե Ա.Խաչատրյանի պնդումները համապատասխանում են իրականությանը, ապա ԱՀ ոստիկանության տվյալ ծառայողների գործողությունները անընդունելի են և ենթակա են խիստ իրավական գնահատականի», – հայտարարել էր Արցախի ՄԻՊ-ը։