Որոնք են երաշխիքները, որ մարտի 1-ի զոհերի հարազատները փոխհատուցում կստանան
ԱԺ-ում այսօր քննարկվում է Ելքի հեղինակած «Մարտի մեկ, երկուսի իրադարձությունների մասին» հայտարարության նախագիծը: Ելք խմբակցության ղեկավար Նիկոլ Փաշինյանի ելույթից հետո հարակից զեկուցող, ՀՀԿ խմբակցության պատգամավոր Ռուստամ Մախմուդյանն իր ելույթում հայտարարեց, որ պատգամավորների քվեարկությունը կպայմանավորվի նրանով, թե այս փաստաթղթի անհրաժեշտություն կա՞, թե ոչ. «Մյուս հարցն այն է, թե արդյոք մարտի մեկի զոհերի ծնողները դիմե՞լ են համապատասխան մարմիններին ու ստացել են մերժո՞ւմ: Այս հարցի պատասխանն ուղղությունը փոխում է»: Ինչպես տեղեկացրեց՝ Հայաստանի քաղաքացիաիրավական օրենսդրությունը հստակ նշում է այն կարգավորումները, որոնք հնարավորություն են տալիս տուժողի իրավահաջորդներին դիմել իրենց հասցված վնասի փոխհատուցում ստանալու համար: Ելք խմբակցության պատգամավոր Էդմոն Մարուքյանը, նրան հիշեցրեց, որ Կառավարությունը ժամանակին որոշում է կայացրել ու 600 մլն դրամի փոխհատուցում է տվել վնասված խանութների ու գույքի տերերին: Ի պատասխան Մախմուդյանը պահանջեց խոսել իրավական տեսանկյունից. «Եթե ներկայացնեք հակառակ կարգավորումները, ես շատ ուշադիր ձեզ կլսեմ: Արձանագրենք մի բան, որ Քաղաքացիական օրենսգրքով կա կարգավորում հստակ: Մեր քննարկումները պետք է իրավական դաշտում լինեն»,- ԱԺ ամբիոնից հայտարարեց Ռուստամ Մախմուդյանը: «Ելք» խմբակցության ղեկավար Նիկոլ Փաշինյանն էլ հարցրեց, թե ի՞նչ է նկատի ունեցել ՀՀ նախկին գլխավոր դատախազ Գևորգ Կոստանյանը՝ հայտարարելով, որ մարտի 1-ի զոհերի հարազատները կարող են դիմել փոխհատուցման համար և ստանալ, և որոնք են երաշխիքները, որ նրանք դիմելուց հետո փոխհատուցում կստանան: «Երաշխիքների մասին ոչինչ չեմ կարող ասել, քանի որ դա իմ գործառույթների մեջ չի մտնում: Երաշխիքը հետևյալն է, որ վնասի փոխհատուցման գործընթացի հանգուցալուծումը դատական պաշտպանության իրավունքն է, իսկ կոնկրետ օրենքի որ հոդվածներն են, որ դրույթներն են, որոնք ամբողջապես լիարժեք են դարձնում այդ փոխհատուցման ինստիտուտը, ես ասեմ, որ քաղաքացիաիրավական օրենսդրությունը հստակ նշել է այն իրավական կարգավորումները, որը հնարավորություն է տալիս տուժողի իրավահաջորդներին դիմել իրենց հասցված վնասի փոխհատուցում ստանալու համար»,- նշեց Մախմուդյանը:
Հետևեք մեզ Viber-ում
