5 շրջաններ հանձնելու մասին պայմանագիր չկա. Շավարշ Քոչարյան
5 շրջաններ հանձնելու մասին խոսակցությունները Ադրբեջանն է տարածում կամ իր, կամ այլ անձանց միջոցով, նման բան գոյություն չունի: Այս մասին այսօր՝ մարտի 19-ին, ԱԺ-ում լրագրողների հետ զրույցում նշել է Հայաստանի ԱԳ փոխնախարար Շավարշ Քոչարյանը:Շավարշ Քոչարյանն ասաց, որ դա Ադրբեջանի ցանկությունն է, որն ինքը պարբերաբար կամ իր շուրթերով, կամ այլ անձանց շուրթերով փորձում է սփռել մամուլի էջերում: «Մենք միշտ պետք է գիտակցենք, որ բանակցություններն ունեն երկու հարթություն: Դա համանախագահները հստակ գիտակցում են եւ ուղղակի հայտարարել են, որի մասին են խոսում եւ Վիեննայի, եւ Սանկտ-Պետերբուրգի, եւ Կրակովի պայմանավորվածությունները, որպեսզի բանակցային գործընթացում հնարավորություն լինի խոսել առաջընթացի մասին, անհրաժեշտ է, որ կողմերի միջեւ լինի վստահություն: Վստահության անհրաժեշտ մասը նրանում է, որ կողմերը չկրակեն, սադրանքներ չկազմակերպեն»,-ասաց նա: Խոսելով Արցախի Հանրապետության նախագահ Բակո Սահակյանի ԱՄՆ այցից՝ ասաց, որ դա շատ կարևոր քայլ էր: «Մենք պետք է գիտակցենք, որ Արցախի հանրապետությունը դե ֆակտո անկախ պետություն է, ճիշտ է, դեռ չճանաչված: Նա վարում է իր արտաքին քաղաքականությունը, որն իհարկե, սահմանափակ է միջազգային չճանաչման պատճառով»,-ասաց նա:
Հետևեք մեզ Viber-ում
