Կարեն Կարապետյանն ու Արմեն Գեւորգյանը հաճախակի հանդիպում են

Ինչպես հայտնի է Սերժ Սարգսյանի վարչապետ դառնալուն այլընտրանք չկա, ապրիլին ՀՀԿ-ն հենց նրա թեկնածությունը կներկայացնի վարչապետի պաշտոնում, որը նոր Սահմանադրությամբ փաստացի երկրի ղեկավարի պաշտոնն է լինելու։ Գործող վարչապետ Կարեն Կարապետյանին, բնականաբար, այս որոշումը դուր չի գալիս եւ նա որոշ շրջանակներում չի կարողանում թաքցնել իր անհամաձայնությունն այս առիթով, ասելով նաեւ, որ չի բացառվում ինքը թողնի-հեռանա՝ հրաժարվելով առաջին փոխվարչապետի պաշտոնից։ Սակայն վերջին օրերին, մեր տեղեկություններով, Կարեն Կարապետյանն ինտենսիվ հանդիպումների ու շփումների մեջ է նախագահի աշխատակազմի ղեկավար Արմեն Գեւորգյանի հետ, որը ըստ լուրերի զբաղեցնելու է փոխվարչապետերից մեկի պաշտոնը։ Ինչպես գիտենք՝ Գեւորգյանը Սերժ Սարգսյանի ամենամերձավոր մարդկանցից մեկն է։ Մեզ չհաջողվեց պարզել, թե ինչ հանդիպումներ են դրանք, սակայն հնարավոր է՝ կամ արդեն Գեւորգյանին հաջողվել է Կարեն Կարապետյանին համոզել եւ վերջինս համակերպվել է Սարգսյանի վարչապետ դառնալուն ու հիմիկվանից թիմն են ձեւավորում, կամ էլ չի բացառվում, որ այդ հանդիպումները ավելին հեռու գնացող նպատակներ են հետապնդում։