Նադեժդա Սավչենկոյին ներառել են «Միրոտվորեց» կայքի տվյալների բազայում

Ուկրաինայի Գերագույն ռադայի պատգամավոր Նադեժդա Սավչենկոն ընդգրկվել է «Միրոտվորեց» կայքի տվյալների բազայում, որը տեղեկություններ է հրապարակում Դոնբասում «ինքնահռչակ հանրապետությունների» կողմից մարտական գործողությունների մասնակիցների մասին: Ինչպես փոխանցում է DW.com-ը՝ Սավչենկոյին բնորոշում են որպես «հայրենիքի դավաճանի» և «ահաբեկիչների աջակցի»: Մարտի 15-ին Ուկրաինայի գլխավոր դատախազ Յուրի Լուցենկոն տեղեկացրել է ուկրաինական խորհրդարանին, որ Նադեժդա Սավչենկոն, հետաքննության տվյալներով, ներգրավված է եղել ահաբեկչությունների, մասնավորապես՝ Գերագույն ռադայի նիստերի դահլիճում պայթյունների նախապատրաստման գործում: Դրան ի պատասխան Սավչենկոն Գերագույն Ռադայում Ուկրաինայի ազգային անվտանգությանը և Գլխավոր դատախազությանը առաջարկել է իրեն հարցաքննել պոլիգրաֆի (ստի դետեկտորի) միջոցով: Այս մասին հաղորդում է УНИАН–ը։ «Առաջարկում եմ դատախազությանը և բոլոր համապատասխան մարմիններին հրապարակայնորեն հարցաքննել ինձ պոլիգրաֆի՝ ստի դետեկտորի միջոցով և հրապարակայնորեն՝ ամբողջ Ուկրաինայով և ամբողջ աշխարհի առաջ լսել հարցերի պատասխանը, եթե նրանք չեն վախենում»,–ասել է նա։