Սեռական հարաբերություն՝ 15 հազար դրամի դիմաց․ 26-ամյա երիտասարդը դանակը դրել է մերսող կնոջ կոկորդին, քարշ տվել մազերից․․․
Ընդհանուր իրավասության դատարանի վճռով՝ 26-ամյա երիտասարդը մեղավոր է ճանաչվել ավազակության համար առաջադրված մեղադրանքում՝ դատապարտվելով 6 տարի 6 ամիս ժամկետով ազատազրկման։ 26-ամյա երիտասարդին մեղադրանք է առաջադրվել այն բանի համար, որ «Օդնոկլասսնիկի» սոցիալական կայքի միջոցով ծանոթացել է տուժող կնոջ հետ, մերսում կատարելու համար հանդիպել է վերջինիս կողմից վարձակալած բնակարանում և 15.000 դրամի դիմաց սեռական հարաբերություն ունեցել:
Հերթական անգամ կրկին զանգահարել է կնոջը, մերսման պատրվակով պայմանավորվել վերջինիս հետ և գնացել բնակարան, որտեղ իր մոտ գտնվող` որպես զենք օգտագործվող կտրող-ծակող առարկայի գործադրմամբ, հյուրասենյակում դիտավորությամբ առողջության համար վտանգավոր բռնություն գործադրելու սպառնալիքով՝ ավազակային հարձակում է կատարել կնոջ նկատմամբ` կտրող-ծակող առարկան պահելով տուժողի պարանոցի շրջանում, պահանջել է արժեքավոր իրեր և գումար, սակայն մերժում ստանալով, բնակարանից կնոջ փախուստը կանխելու նպատակով, վերջինիս հրելով գցել է հատակին և հափշտակել նրան պատկանող ոսկյա շղթան, բջջային հեռախոսը, դյուրակիր համակարգիչը, դրա տակ դրված 300.000 դրամ գումարն ու դիմել փախուստի` տուժողին պատճառելով ընդհանուր խոշոր չափերի` 532.000 դրամի գույքային վնաս:
Ամբաստանյալին հրավիրել է հյուրասենյակ, որտեղ նստելուց անմիջապես հետո վերջինս հանել է դանակը, այն դրել իր կոկորդին և սպառնալով պահանջել է պարանոցի ոսկյա շղթան: Դրանից հետո ամբաստանյալը ցանկացել է սեղանից վերցնել իրեն պատկանող երկու բջջային հեռախոսները: Ինքը հայտնել է, որ բջջային հեռախոսներից մեկը գրանցված է իր անվամբ, և այն վերցնելու դեպքում շատ արագ կերպով կբռնվի: Դա լսելով՝ ամբաստանյալը վերցրել է երկրորդ բջջային հեռախոսը, կողքի սեղանին դրված դյուրակիր համակարգիչը և դրա տակ դրված գումարը: Դյուրակիր համակարգիչը լարերից անջատելու ժամանակ կարողացել է ազատվել ամբաստանյալից և փորձել է դիմել փախուստի, սակայն վերջինս վազել է իր հետևից և շքամուտքի մոտ բռնելով մազերից՝ քարշ տալով ներս է տարել, ապա հափշտակելով 13-15 գրամ քաշով ոսկյա շղթան, բջջային հեռախոսը, 8.000 դրամը, մուգ մոխրագույն դյուրակիր համակարգիչը և դրա տակ դրված 300.000 դրամ գումարը՝ դիմել է փախուստի։
Ըստ դատական ակտի՝ դեպքից հետո տուժողն ամբաստանյալին հաղորդագրություններ է ուղարկել, այդ թվում՝ «մատնահետքերդ սաղ կան», «բեր սաղ, թե չէ վատ ա լինելու»։
Հետևեք մեզ Viber-ում
