«Իրան, Իրան և Իրան». Նեթանյահուն՝ Իսրայելի 3 գլխավոր խնդիրների մասին

Ամերիկյան Fox News հեռուստաալիքով հեռարձակվել է Իսրայելի վարչապետ Բենիամին Նեթանյահուի հետ հարցազրույցը՝ Life, Liberty & Levin շոուի համար: Նեթանյահուն խոսել է ԱՄՆ գործող նախագահ Դոնալդ Թրամփի հետ «եզակի» հարաբերությունների մասին: Վարչապետն ասել է, որ չի կարող ասել, թե ինչու է այդպես, սակայն նշել է, որ իրեն Թրամփի մեջ գրավում են ուղղամտությունն ու համառությունը: Հարցին՝ որո՞նք են Իսրայելի 3 գլխավոր խնդիրները, Նեթանյահուն պատասխանել է. «Իրան, Իրան և Իրան»: Նա նշել է, որ Իսլամական Հանրապետությունը ձգտում է ստեղծել «ագրեսիվ կայսրություն»՝ հալածանքների ենթարկելով սեփական ժողովրդին: Նեթանյահուի խոսքով՝ Իրանը ոչ միայն ցանկանում է նվաճել Մերձավոր Արևելքը, այլև ձգտում է իշխել ողջ աշխարհին: «Այսօրվա իրանական ռեժիմը հովանավորում է համաշխարհային ահաբեկչությունը և շարունակում է սեփական միջուկային զենքի մշակման փորձերը՝ սպառնալով ոչ միայն Իսրայելին, այլև ողջ աշխարհին:Ես կարծում եմ՝ դա պետք է կասեցնել»,- հայտարարել է Նեթանյահուն: