«Մեր ժողովուրդն ուզում է իր սառնարանում լիքը ապրանք լինի, տնեցիք լավ ապրեն».Գ.Սահակյան

Բացառում եմ, որ ՀՀԿ-ում որևէ մեկը կճնշի որևէ մեկին:Ս.Սարգսյանի հայտարարությունը քաղաքական էր, իսկ Սարգսյանը միակն է, որ ՀՀ հզորագույն քաղաքական ուժի լիդերն է, որ մասնակցել է Արցախյան պատերազմին և արտաքին քաղաքականությանը, և կկարողանա այդ գործն առաջ տանել,- ԱԺ-ում լրագրողների հետ զրույցում, պատասխանելով հարցին, որ, եթե Սերժ Սարգսյանը չի ցանկանում դառնալ վարչապետ, ինչո՞ւ է կուսակցությունը ճնշում գործադրում նրա վրա, պատասխանեց ՀՀԿ խմբակցության պատգամավոր Գալուստ Սահակյանը : «  Խնդիրը քաղաքական պիտի նայել: Դա քաղաքական հայտարարություն է, իրոք, նա այդ հայտարարությունը կատարել է, իրոք, որևէ խնդիր չենք տեսնում առաջիկայում: Այս պահին մենք այլ թեկնածու չունենք, դրա համար, կարծում եմ, որ կուսակցությունն իր խոսքը պետք է ներկայացնի»,- ասաց Գ.Սահակյանը` չհամաձայնելով, որ միայն մեկ թեկնածու ունենալը ՀՀԿ-ի ձախողումն է: Ազատության հրապարակում բողոքի շարժում սկսելու «Ելքի» փորձերը հաջողություն չեն ունենա,պնդում է Գ.Սահակյանը.«Մեր ժողովուրդն ընդդիմադիր ժողովուրդ չի: Նա ուզում է լավ ապրի, այսինքն` իր սառնարանում լիքը ապրանք լինի, տնեցիք լավ ապրեն, ժամանակին կարողանան օդափոխվել: Սա է մեր ժողովրդի վիճակը»: «Կուսակցությունն է կարողանում ժողովուրդ հավաքել, որը տեղական ընտրությունների ժամանակ իշխանություն է ձեռք բերել, իսկ մնացած բոլոր կուսակցությունները, որ Հայաստանի մասին «մեծ երազներ են ներկայացնում, որ երբեմն-երբեմն մտածում ես` ինչ լավ կլիներ, էդ երազները շուտ լինեին», նրանք ժողովուրդ չեն կարող հավաքել:Մարդիկ մտածում են, որ գալիս են փողոց, հաջորդ օրը կամ հաջորդ ամսվա մեջ լավ չի լինելու: Ժամանակը ցույց տվեց, որ այդ դուրս գալով՝ որևէ մեկը չի կարող որևիցե բանի հասնել»,- ասաց պատգամավորը: