Անվտանգության խորհուրդը կղեկավարի վարչապետը
Կառավարության հրավիրած ԱԺ արտահերթ նիստին այսօր քննարկվում էր «ՏՄՄՊՀ մասին» օրենքի համապատասխանեցումը ԵՏՄ եւ ԵՄ կարգավորումներին նախագիծը: Հանձնաժողովի նախագահ Արտակ Շաբոյանը իր եզրափակիչ ելույթում հայտարարեց, որ նախագծում սահմանվել են հակամրցակցային նոր սահմանումներ` գների չհիմնավորված բարձրացում ու նվազեցում, խտրական պայմաններ. «Այս նոր գործիքները հնարավորություն կտան առավել արդյունավետ բացահայտել հակամրցակցային դրսեւորումները»։ ԱԺ-ն սկսեց քննարկել «Օտարերկրացիների մասին» օրենքի փոփոխությունները։ Այն ներկայացրեց ՀՀ փոխոստիկանապետ Վարդան Եղիազարյանը,ըստ որի` օտարերկրացիներին հատուկ կացության իրավունքները, ըստ նոր Սահմանադրության, վերապահվում են վարչապետին: Երկրորդ ընթերցմամբ և ամբողջությամբ խորհրդարանն ընդունեց «Անվտանգության խորհրդի կազմավորման և գործունեության մասին» ՀՀ օրենքի նախագիծը,որին դեմ էր միայն «Ելք»-ը։ Ըստ նախագծի՝ Անվտանգության խորհուրդը պետական մարմին է, որը գլխավորում է վարչապետը: Անվտանգության խորհրդի անդամներն են վարչապետը, առաջին փոխվարչապետը, փոխվարչապետները, Անվտանգության խորհրդի քարտուղարը, պաշտպանության նախարարը, արտաքին գործերի նախարարը, ազգային անվտանգության ծառայության տնօրենը, ոստիկանության պետը, զինված ուժերի գլխավոր շտաբի պետը: Անվտանգության խորհրդի՝ պաշտպանության ոլորտի քաղաքականության հիմնական ուղղություններին վերաբերող հարցերով որոշումներն ընդունվելու են Անվտանգության խորհրդի առնվազն 7 անդամի ձայնով, իսկ խորհրդատվական բնույթի որոշումները՝ նիստին ներկա անդամների ձայների մեծամասնությամբ: Խորհուրդը ղեկավարելու է վարչապետը:
Հետևեք մեզ Viber-ում
