«Ինֆորմացիա կա, որ այդ դեղատոմսերը դեղատների դեմը գրում, տալիս են». վարչապետ
Կառավարության այսօրվա նիստում իրավական ուժ ստացավ մարտի 1-ից մի շարք դեղեի դեղատոմսով բաց թողնելու մասին որոշումը: Առողջապահության փոխնախարար Սամվել Մարգարյանը նշեց, թե մարտի 1-ից պետք է բազմաթիվ դեղեր վաճառվեն միայն դեղատոմսի առկայությամբ, սակայն նրա խոսքով, հաշվի առնելով հասարակական արձագանքը, որոշվել է այդ գործընթացը փուլ առ փուլ իրականացնել: Մասնավորապես, նա նշեց, թե մարտի 1-ից հոգեմետ դեղերին է դա վերաբերում, հուլիսի 1-ից ներարկումային դեղերին, իսկ արդեն հոկտեմբերի 1-ից կտարածվի նաեւ այլ դեղամիջոցների վրա: «Ուսումնասիրելով ստեղծված իրավիճակն՝ առաջարկում ենք անցման ժամանակացույց. առավել ռիսկային հոգեմետ դեղերը և հակաբիոտիկները դրվել են մարտի 1-ից, հաջորդ փուլից՝ հունիսի 1-ից պարտադիր պահանջը կտարածվի բոլոր ներարկվող դեղերի վրա, և արդեն հոկտեմբերի 1-ից, պահանջը օրենսդրական ամբողջ ուժով կտարածվի դեղերի ողջ ցանկի վրա»,- նշեց Մարգարյանը: Արձագանքելով առողջապահության փոխնախարարին՝ վարչապետն ասաց. «Պարոն Մարգարյան, խնդրում եմ ուշադիր լինեք՝ արդեն ինֆորմացիա կա, որ այդ դեղատոմսերը դեղատների դեմը գրում, տալիս են և դրա համար լրացուցիչ վճար կա: Շատ ուշադիր եղեք, որպեսզի բուտաֆորիա չդառնա դա»:
Հետևեք մեզ Viber-ում
