Ապրիլի 9-16-ը կարող է լինել իշխանափոխություն.Նիկոլ Փաշինյան
ԱԺ ճեպազրույցների ժամանակ «Ելք» խմբակցության ղեկավար Նիկոլ Փաշինյանը հայտնեց,որ ապրիլի 9-16-ը Սերժ Սարգսյանը ՀՀ պետական կառավարման համակարգում ոչ մի պաշտոն չի ունենալու, և այդ ժամանակահատվածում, եթե լինի ժողովրդի կամարտահայտությունը, ապա ինքը կարող է երաշխավորել՝ կլինի իշխանափոխություն։ «Ելք»-ի նպատակն է արձանագրել եղած խնդիրը ու դրա լուծման մասին ժողովրդին դիրքորոշում արտահայտելու հնարավորություն տալ,ասաց Փաշինյանը: Դիտարկմանը, թե արդյոք չի բացառում, որ «Ելք»-ը համախմբի հասարակությանը, մինչդեռ ապրիլի 16-ին պարզվի, որ Սերժ Սարգսյանը չի հավակնում վարչապետի թեկնածությանը, այդ դեպքում ինչպես է վարվելու «Ելք»-ը, Փաշինյանն ասաց. «Նման սցենարն ես այս պահին հավանական չեմ համարում։ Նման սցենար միայն հավանական եմ համարում ժողովրդի կամարտահայտության դեպքում»։ «Մենք ավելի քան վստահ ենք՝ վարչապետի պաշտոնում առաջադրվելու է Սերժ Սարգսյանի թեկնածությունը: Քանի որ վաղվա արտահերթի օրակարգում ընդգրկված օրենսդրական նախաձեռնությունների փաթեթը վկայում է՝ անցում ենք կատարում վարչապետական դիկտատուրայի համակարգի, իսկ նման համակարգ միայն Սերժ Սարգսյանի համար կարող է լինել»:
Հետևեք մեզ Viber-ում
