ՀՅԴ-ն ներքին կարգով կիմանա վարչապետի անունը

Ազգային ժողովի ՀՅԴ խմբակցությունը պատրաստ է քննարկել ՀՀ վարչապետի ցանկացած թեկնածուի անուն, որ կառաջարկի ՀՀԿ-ն: Խմբակցության ղեկավար Արմեն Ռուստամյանը այս մասին նշեց ԱԺ-ում խորհրդարանական ճեպազրույցների շրջանակներում լրագրողների հետ հանդիպմանը: «Մենք կքննարկենք կոնկրետ անձի հետ կապված հարցը», - նշեց նա։ Դիտարկմանը, թե արդյոք ՀՅԴ-ն Սերժ Սարգսյանից բացի այլ անձի էլ է տեսնում որպես վարչապետի թեկնածու, Ռուստամյանն ասաց. «Մենք նման իրավունք չունենք, այդ հարցը Հանրապետականների դաշտում է գտնվում։ Նրանք պետք է առաջադրեն և իրենք ունեն այդ իրավունքը, որ քննարկեն իրենց մեջ և կատարեն առաջադրումը, որից հետո ճիշտ կլինի, որ Դաշնակցությունն իր խոսքն ասի։ Ընթացակարգը կոալիցիոն հուշագրով հենց այդպես է նախատեսված և մենք չենք պատրաստվում շեղվել դրանից»։ Նա կարծում է, որ արդեն ապրիլի 9-ին մոտ, երբ կավարտվեն ՀՀ գործող Նախագահ Սերժ Սարգսյանի լիազորությունները, իշխանական կոալիցիայում ՀՀ վարչապետի թեկնածուի շուրջ առաջին քննարկումները տեղի կունենան: «Կոալիցիայի հուշագրով նախատեսված է, որ վարչապետի թեկնածու առաջադրելու իրավունքը պատկանում է Հանրապետական կուսակցությանը, բայց բնական է՝ իրենք պետք է ներկայացնեն թեկնածուին, և կոալիցիան պետք է այդ հարցը քննարկի: Սա տեղի կունենա ապրիլի 9-ին մոտ: Մենք, կարծում եմ, ապրիլի 9-ից շուտ չենք հրապարակի»,- նշեց Ռուստամյանը: Ռուստամյանը շեշտեց, որ ՀՅԴ-ն երբեք չի բացառել, որ Սերժ Սարգսյանը կարող է հավակնել վարչապետի պաշտոնին։ Միևնույն ժամանակ Ռուստամյանը նկատեց, որ համակարգում փոփոխությունները փաստում են՝ միապետական կառավարում այլևս չի լինի։ «Համակարգն այնպես էր փոխվում, որ նույն Սերժ Սարգսյանը չի ունենալու նույն իրավասությունները, ինչ՝ նախագահ Սերժ Սարգսյանը», - ասաց նա։ «Դեռ նոր ընտրված նախագահն էլ պետք է ստանձնի իր լիազորությունները, որովհետև նա էլ պետք է մասնակցի այդ պրոցեսին»,- ասաց պատգամավորը : Արմեն Ռուստամյանը, սակայն, կարծիք հայտնեց, որ իրենք մինչև ապրիլի 9-ը ներքին կարգով կիմանան վարչապետի թեկնածուի անունը: Հարցին՝ ՀՅԴ-ն պատրաստ է ՀՀ գործող Նախագահ Սերժ Սարգսյանից բացի այլ թեկնածություն ևս քննարկել, Ռուստամյանն ընդգծեց, որ պատրաստ են քննարկել ցանկացած թեկնածություն, որ կառաջարկի Հանրապետական կուսակցությունը: Լրագրողներից մեկի  դիտարկմանը, թե խորհրդարանում վերջին շաբաթների ընթացքում քննարկված օրինագծերում առաջարկվող փոփոխությունները մեծամասամբ ուղղված էին վարչապետի դերի բարձրացմանն ու ըստ էության հանրապետության համար կարևոր հարցերի մասին որոշում կայացնելու է ՀՀ վարչապետը, արդյոք այս պայմաններում կարելի է խոսել ոչ միապետական կառավարման համակարգի մասին, Ռուստամյանը նկատեց. «Լիազորությունները, որ ուներ նախագահը, բաշխվել են։ Ապակենտրոնացում է տեղի ունեցել՝ մի մասը խորհրդարանին, մի զգալի մասը՝ կառավարությանը, մի մասն էլ անկախ դատական իշխանությանն է անցել։ Վարչապետը, բնականաբար, որոշակի լիազորություններ ունի։ Ճյուղերի տարանջատումը երաշխավորող համակարգ է, որտեղ ամեն մեկը վերահսկման ֆունկացիա է իրականացնելու»։