«Լևոն Ալթունյանի հերթական խայտառակ նախաձեռնությունը. նրան չի հետաքրքրում քաղաքացիների առողջությունը». Մարինա Խաչատրյան (բժշկուհի, Երկիր Ծիրանի) (video)

«Կլինեն շատ դեղատներ, որոնք կաշխատեն առանց դեղատոմսի, սա կարծում եմ անակնկալ չէ»,-այսօր Հայելի ակումբում ասաց Երկիր ծիրանի կուսակցության անդամ, բժշկուհի Մարինա Խաչատրյանը: 2018 թվականի մարտի 1-ից Հայաստանի Հանրապետությունում գրանցված հակավարակային (այդ թվում հակաբիոտիկներ), հսկվող և հորմոն պարունակող դեղերը ձեռք բերելու համար անհրաժեշտ է բժշկական կազմակերպության կողմից տրված դեղատոմսի առկայություն` ըստ սահմանված կարգի: Բժշկուհին վստահ է, որ դեղերը ևս կթանկանան. «Այն դեղատները, որոնք կաշխատեն օրենքով և թիկունք չունեն, կփակվեն: Իսկ այն աշխատողները,ովքե՞ր են աշխատում մոնոպոլ, օլիգարխիկ դեղատներում, ներեցե՛ք, բայց այդ դեղատներում աշխատողներն այնքան փորձառու չեն, որքան մեր շատ մասնագետներ» : Մարինա Խաչատրյանը նշեց, որ իրենք անցկացրել են որոշակի հետազոտություն, և ստացել հետևյալ արդյունքները. «Դեղատոմսում իրավունք կա նշանակել միայն առօրյայում օգտագործվող երկու դեղ: Եթե հիվանդը կարիք ունի 6 դեղորայքի, հետևաբար պոլիկլինիկայի բժիշկը պետք է լրացնի 3 դեղատոմս: 6-7 դեղորայքի կարիք ունեցող քաղաքացուն դեղ նշանակելը կլինի ավելորդ թղթաբանություն, այսկերպ հերթեր կգոյանան, սա խայտառակություն է»: Եզրափակելով խոսքը՝ բժշկուհին նշեց, որ շատ ավելի ժամանակ բժիշկը ստիպված է լինում տրամադրել գրագրությանը և հիվանդներին բուժելու փոխարեն զբաղվում է գրագրությամբ. «Դեղատոմսերով դեղերի դուրս գրելու նոր նախագիծը ավելացնելու է գրագրությունը, սրանից տուժելու է քաղաքացին» : Առավել մանրամասն՝ տեսանյութում.