Արմեն Սարգսյանի ներկայացրած փաստաթղթերը քննարկումների առարկա չպիտի դառնային. Արփինե Հովհաննիսյան

ՀՀ ԱԺ փոխնախագահ Արփինե Հովհաննիսյանը լրագրողների հետ զրույցում անդրադարձավ Արմեն Սարգսյանի քաղաքացիության հարցի շուրջ առաջացած քննարկումներին:  «Արմեն Սարգսյանը ներկայացրեց այն հիմքերը, որոնց համապատասխան այդ իրավիճակը չպետք է դառնար քննարկման առարկա: Ես համոզված եմ, որ եթե կա որևէ հարց, որի իրավասությունը գտնվում է ոչ թե իմ ու ձեր որոշելիքի տիրույթում, այլ՝ կոնկրետ անձի, ապա ճիշտ չէ, որ ես գնահատական հնչեցնեմ», - նշեց նա։ Հարցին, եթե պարզվի, որ նրա քաղաքացիություն ունենալու լեգիտիմության հետ կապված խնդիրներ կան, ի՞նչ քայլեր պետք է արվեն այդ ժամանակ, Արփինե Հովհաննիսյանը նշեց. «Այս պահի դրությամբ ոչ որպես ԱԺ փոխնախագահ, ոչ որպես շարքային քաղաքացի՝ իրավասու չեմ ոչ վիճարկելու, ոչ կասկածի տակ դնելու պաշտոնական մարմնի կողմից տրված պաշտոնական փաստաթուղթը, որով հավաստվում է Սահմանադրությամբ նախատեսված պահանջների համապատասխանության հարցը»։