Հայաստանում շատերը չգիտեն, թե ինչ է տեղի ունեցել 10-ը տարի առաջ. Լևոն Զուրաբյան

ՀԱԿ փոխնախագահ Լևոն Զուրաբյանը «Մարտի 1-ի» տարելիցին նվիրված հանրահավաքին ելույթի ժամանակ մեկ անգամ ևս հիշեց դեպքերի մասին: «Մենք հավաքվել էինք ընտրակեղծարարություններից հետո հանրահավաքի: Լևոն Տեր-Պետրոսյանը տարել էր ջախջախիչ հաղթանակ, և հեռուստադիտողը գիտեր դրա մասին, բայց այդ հաղթանակը գողացվեց իշխանությունների կողմից: 10 օր մենք անդադար ցույցեր էինք անում, և հասկանալի էր, որ, եթե ժողովուրդը մնար Ազատության հրապարակում, ապա մարտի 8-ին Սահմանադրական դատարանը մի վճիռ էր հանելու, որով, ըստ էության, ժողովրդին կվերադարձվեր իր քվեն: Դուք բոլորդ, որ այստեղ հավաքված եք, գիտեք, թե ինչ է եղել մարտի մեկին, ինչն էր այդ իրադարձությունների իմաստը, և մենք այս առիթը ցանկանում ենք օգտագործել նաև դրա համար, նոր սերունդների համար, այն մարդկանց համար, ում գիտակցությունը լվացվում է իշխանական պրոպագանդայի կողմից, ցանկանում ենք թարմացնել նրանց հիշողությունը»: Ըստ նրա՝ Հայաստանում շատերը չգիտեն, թե ինչ է տեղի ունեցել 10-ը տարի առաջ: «10 տարիների ընթացքում  այսօր գիտակցական տարիքի մեջ են մտնում մարդիկ, որոնք այդ ժամանակ երեխաներ էին: Ընտրակեղծարարությունները, պատմության կեղծարարության դեպքերը Հայաստանում ստեղծել են մի միջավայր, որ կարծես ուզում են մոռացնել տալ Մարտի 1-ի դեպքերը»,- հայտարարեց նա: