ՄԱԿ-ի գլխավոր քարտուղարի կոչը Թուրքիային

ՄԱԿ-ի գլխավոր քարտուղար Պան Գի Մունը Թուրքիայի իշխանություններին կոչ է արել հարգել խոսքի ազատությունը այն բանից հետո, երբ դատարանն ընդդիմադիր Zaman թերթին հոգաբարձուներ է նշանակել: Reuters-ի հաղորդմամբ՝ այս մասին հայտարարել է ՄԱԿ-ի ներկայացուցիչ Ֆարհան Հաքը: Ստամբուլի դատարանը ուրբաթ հոգաբարձուներ է նշանակել ընդդիմադիր Zaman թերթը ղեկավարելու համար: Պարբերականի լրագրողները կարծում են, որ դա կհանգեցնի թերթի փակման: Լույս շաբաթ օրվա գիշերը ոստիկանությունը ջրցան մեքենաների և արցունքաբեր գազի միջոցով ցրել է ցույցը, որին հավաքվել են Zaman-ի հարյուրավոր ընթերցողներ: Այնուհետև ոստիկանները ներխուժել են խմբագրության շենք՝ այնտեղից դուրս հանելով աշխատակիցներին: Արցունքաբեր գազից տուժել են մի քանի ընդդիմադիր պատգամավոր և թերթի աշխատակից: «Գլխավոր քարտուղարը տեղյակ է Թուրքիայում մարտի 4-ին Feza Media Group-ի դեմ դատարանի որոշմամբ հրապարակված փոփոխությունների մասին»,- մեջբերում է Reuters-ը Հաքի խոսքերը: Նա հավելել է, որ Պան Գի Մունը հետևում է Zaman թերթի հետ կապված իրավիճակին: ՄԱԿ-ի գլխավոր քարտուղարը նաև կոչ է արել, որպեսզի «արտահայտման ազատությունները հարգվեն ցանկացած միջոցների ձեռնարկման դեպքում»՝ ասել է Հաքը: