Պատասխանատվություն պետք է կրեք.վարչապետի հորդորը

«Գարնան ոռոգման ջրամատակարարման նախապատրաստական աշխատանքների շրջանակներում Ջրային տնտեսության պետական կոմիտեն իրականացնում է ջրանցքների մաքրման ու ընթացիկ նորոգման աշխատանքներ», - կառավարության նիստում հայտարարեց վրաչապետ Կարեն Կարապետյանը: «Իրականացված ուսումնասիրությունների համաձայն՝ աշխատանքների զգալի մասն ուղղվում է ջրանցքներ թափված կենցաղային ու այլ բնույթի աղբի մաքրմանը: Ստեղծվածը խոչընդոտում է ջրամատակարարման կատարմանը ու առաջացնում է լրացուցիչ ծախսեր», - նշեց նա և  հանձնարարեց ձեռնարկել համալիր միջոցառումներ ֆիզիկական ու իրավաբանական անձանց կողմից ոռոգման ջրանցքներում աղբ թափելու դեպքերը կանխարգելելու նպատակով: Վարչապետը տարածքային կառավարման ու զարգացման նախարար Դավիթ Լոքյանին ու Ջրպետկոմի նախագահին հանձնարարեց մեկամսյա ժամկետում Ազգային ժողով ներկայացված վարչական իրավախախտումների վերաբերյալ օրենսգրքում փոփոխությունների կատարման օրենսդրական փաթեթում սահմանված կարգով ներկայացնել ոռոգման ջրանցքներում աղբ թափելու, աղտոտելու պատասխանատվության միջոցները խստացնելու վերաբերյալ լրամաշակումներ: «Շատ պարզ խնդիր է: Կանալները, խողովակները մաքրելու ժամանակ կենցաղային աղբը բերում թափում ենք, հետո բողոքում ենք, թե ինչու ջուր չունենք: Պարոն Լոքյան, մաքսիմալ կոշտ, մարզպետները, համայնքի ղեկավարները, բոլորը պետք է  պատասխանատվություն կրեն, մենք լրացուցիչ փող ենք ծախսում, որտեղ պռոբլեմը մենք ենք ստեղծում», - ասաց Կարեն Կարապետյանը: