Բարեկարգել և գեղեցկացնել Հայաստանը.վարչապետի հանձնարարականը

Կառավարության այսօրվա նիստում Վարչապետ Կարեն Կարապետյանը հիշեցրեց, որ 2017 թվականի վերջում անդրադարձել էին քաղաքների մուտքերի, ելքերի ճանապարհների բարեկարգման աշխատանքներին, քանի որ այս տարի 3 խոշոր իրադարձություն է տեղի ունենալու Հայաստանում: Դրանք են՝ Ֆրանկոֆոնիայի գագաթաժողովը, առաջին հանրապետության 100-ամյակի միջոցառումները եւ Երեւան քաղաքի 2800-ամյակի միջոցառումները: «Հաշվի առնելով, որ հարկավոր է սեղմ ժամկետներում կատարել բարեկարգման աշխատանքներ, հանձնարարում եմ Ֆինանսների նախարարին, Քաղաքաշինության պետական կոմիտեի նախագահին, ինչպես նաև առաջարկում եմ Երևանի քաղաքապետին՝ մեկամսյա ժամկետում համատեղ մշակել «Զվարթնոց» օդանավակայանից դեպի Երևան տանող ճանապարհի հատվածի բարեկարգման, ճարտարապետական մոտեցումների, խորհրդանիշների տեղադրման միասնական լուծումները, ինչպես նաև նախագծային փաստաթղթերը, այդ թվում, ակնկալվող ֆինանսական ծախսերը և համապատասխան փաթեթը ներկայացնել կառավարության աշխատակազմ», - ասաց նա: Վարչապետը Գյումրիի քաղաքապետին էլ առաջարկեց նույն աշխատանքը կատարել Շիրակ օդանավակայանից մինչեւ Գյումրի քաղաք, քաղաքի հրապարակի եւ Գյումրիից Երեւան հասնող ճանապարհի վերաբերյալ:«Կումայրի վերածնունդ» ներդրումային ֆոնդի հետ համատեղ ապահովել «Շիրակ» օդանավակայանից դեպի Գյումրի, Գյումրու հրապարակի հարակից տարածքի և դեպի Երևան տանող ճանապարհների բարեկարգման, ինչպես նաև կանաչապատման աշխատանքների ավարտը,ասաց նա: