Ոչ թե կցորդ է, այլ առանձին իշխանություն. Ռուստամյան

Բարձրագույն դատական խորհրդի կազմի թեկնածուներին ընտրելու հարցի քննարկմանը ՀՅԴ խմբակցության ղեկավար Արմեն Ռուստամյանն ասաց, որ դժվար է թերագնահատել հարցի լրջությունն ու կարևորությունը մեր ապագայի համար: «ՀՅԴ-ն այս ընտրություններին գնաց «Նոր սկիզբ, արդար Հայաստան» կարգախոսով: Մենք նոր սկիզբը դրել ենք, նոր սկիզբն այս համակարգն է, բայց արդար Հայաստան դեռ չունենք, և այս կառույցը, որն ունի, մեր կարծիքով, ամենագլխավոր առաքելությունը, իմպլեմենտացիայի` այս նոր սահմանադրական կարգը կյանքի կոչելու փուլում, ունենա գլխավոր դերակատարությունը: Բարձրագույն դատական խորհրդից մեր մեծագույն ակնկալիքը դա է լինելու»,- ասաց պատգամավորը: Ըստ նրա՝  եթե օրենքի գերակայություն չկա, չկա իշխանության ճյուղերի տարանջատում, հակակշռում, զսպում, ուրեմն Սահմանադրություն էլ չկա: «Եթե մենք դա չանենք, անընդհատ դժգոհելու ենք իրարից, փորելու ենք` անցյալում ով էր մեղավոր, ով էր ճիշտ, թացն ու չորը միշտ խառնվելու է իրար, և ոչ մի տեղ էլ չենք հասնելու: Մենք  մի օր պետք է ունենայինք այս խիզախությունը` որդեգրելով միջազգային փորձից բխած արդարադատության հիմունքները, անկախ դատական իշխանություն ձևավորելու փորձը, և բերեինք Հայաստան, սա ենք արել: Մինչև հիմա մենք չենք ունեցել որակով, արդար դատական համակարգ, ուստի չենք ունեցել լիարժեք արդարադատություն: Մենք ունենալու ենք դատական իշխանություն, որը ոչ թե կցորդ է, այլ առանձին իշխանություն է, որի միջոցով մեր քաղաքացին կարող է իր իրավունքները պաշտպանել: Քաղաքացին պետք է ունենա երեք տարբեր իշխանություն` իր իրավունքները պաշտպանելու համար»,- ասաց նա: