«Կարող ենք ունենալ ակնկալիքները բավարարող դատական համակարգ». ինչ է խոստանում Կոստանյանը

ԱԺ «Հանրապետական» խմբակցությունն առաջադրում է Գևորգ Կոստանյանի թեկնածությունը Պետական-իրավական և մարդու իրավունքների պաշտպանության հարցերի մշտական հանձնաժողովի նախագահի պաշտոնում: Գևորգ Կոստանյանը շնորհակալություն հայտնեց իրեն այդ պաշտոնում առաջադրելու համար: «Ելք» խմբակցության պատգամավոր Էդմոն Մարուքյանը հետաքրքրվեց, թե ի՞նչ ոճով է նա պատրաստվում աշխատել հանձնաժողովում: Ի պատասխան Կոստանյանն ասաց. «Դուք ինձ այլ պաշտոններում էլ եք տեսել աշխատելիս: Վստահեցնում եմ, որ ոճս անփոփոխ է»: Այնուհետև Գևորգ Կոստանյանն ընդգծեց, որ այդ խորհրդի ձևավորմամբ դատական համակարգի լուրջ բարեփոխումների սկիզբն են դնելու: «Կարող ենք ունենալ ակնկալիքները բավարարող դատական համակարգ երկու դեպքում՝ կադրային ճիշտ քաղաքականություն, դատավորների պատասխանատվություն: Եվ այս մարմնի դերը, որը մենք ձևավորում ենք, հիմնականում այս երկու գործառույթների մեջ է: Այսինքն, և դատական կորպուսի ձևավորման կադրային ընտրությունը և այդ դատավորների պատասխանատվության ենթարկելու հարցում այս մարմինը միակ պատասխանատու սուբյեկտն է: Ես ցանկանում եմ շնորհավորել բոլորիս, քանի որ մենք սկիզբ ենք դնում տրամագծորեն նոր գործընթացի: Ես համոզված եմ, որ արդյունքները մեզ երկար սպասեցնել չեն տալու»,- նշեց Գևորգ Կոստանյանը: Գևորգ Կոստանյանի համար կարևոր էր այն, որ Բարձրագույն դատական խորհրդի անդամները խորհրդարանում պատգամավորների հարցերին պատասխանելու ընթացքում զերծ են մնացել քաղաքական հարցադրումներին պատասխանելուց: Այնուհետև Գևորգ Կոստանյանը հաջողություն մաղթեց Բարձրագույն դատական խորհրդի անդամության թեկնածուներին: