Պահք թե՞ դիետա

«Հասարակության շրջանում երբեմն սխալ ընկալում է լինում և պահքը դիտում են որպես դիետա: Պահքն առ աստված մի տեսակ ուխտագնացություն է»,-այս մասին լրագրողների հետ հանդիպման ժամանակ պարզաբանեց Արարատյան հայրապետական թեմի Նոր Նորքի Սուրբ Սարգիս եկեղեցու խորհրդակատար, Տեր Կարապետ քահանա Կարապետյանը: «Պահքը ոչ դիետա է, ոչ էլ նիհարելու միջոց»,- ընդգծում է քահանան՝ նշելով, որ «պահք» բառն առաջացել է «պահել» բառից, երբ ինքդ քեզ որպես քրիստոնյա հեռու ես պահում չարից և վատ սովորույթներից և մոտենում առ Աստված: Քահանան նշեց, որ պետք է հրաժարվել բոլոր այն վատ երևույթներից, որոնց մարդը գերի է դառնում, պարզապես պետք է դա ոչ միայն մեծ պահքի օրերին լինի, այլ տարվա բոլոր օրերին: Քահանայի խոսքով`ինքդ քեզ հեռու պահելով վատից` մոտենում ես Աստծոն, իսկ Սուրբ գրքում գրված է` եթե մեկ քայլ ես անում առ Աստված, Աստված երկու քայլ է անում դեպի քեզ: «Այս 48 օրերի ընթացքում եկեղեցու բոլոր վարագույրները փակված են լինում, և մարդը պետք է գնա դեպի ապաշխարություն: Այս 48 օրերն այն շրջանն է, որ մտավոր առումով ինքներս մեզ մի հարց պետք է տանք. ո՞վ ենք մենք, ո՞ւր ենք գնում և ի՞նչ նպատակով: Սա հաշվետվության մի շրջան է նաև»,- ասաց Կարապետ քահանա Կարապետյանը: «Պահքը հոգևոր մշակույթ է, որն ամրացնում է մարդու կամքը և մեզ չափավորության մեջ պահում: Պահքի շրջանում պետք է հարցնենք ինքներս մեզ` ո՞վ ենք մենք, ո՞ւր ենք գնում և ի՞նչ նպատակով: Պահքը հաշվետվության շրջան է` ինքներս մեզ և Աստծո առջև»,- եզրափակեց քահանան: Աստղիկ Ավագյան