Առեղծվածային դեպք Սասունիկում. կիսակառույց շինության մեջ հայտնաբերվել է կնոջ դի

Այսօր` մարտի 7-ին, ողբերգական դեպք է տեղի ունեցել Արագածոտնի մարզում: Ժամը 18:00-ի սահմաններում ոստիկանության Աշտարակի բաժին ահազանգ է ստացվել, որ Սասունիկ գյուղի Կարին թաղամասի 9-րդ փողոցի 12 տանն հարակից կիսակառույց շինությունում կնոջ դի կա: Ինչպես դեպքի վայրից հայտնում է ֆոտոլրագրող Գագիկ Շամշյանը, օպերատիվորեն ժամանել է ոստիկանության Աշտարակի բաժնի օպերատիվ խումբը` բաժնի պետ Արմեն Մելոյանի գլխավորությամբ: Ոստիկանների խնդրանքով ժամանել է նաև Արտակարգ իրավիճակների նախարարության փրկարար ծառայության Արագածոտնի փրկարարական վարչության Աշտարակի հրշեջ-փրկարարական ջոկատը: Օպերատիվորեն ժամանել են նաև Աշտարակի շտապօգնության բրիգադն ու դատական բժիշկը: Դեպքի մասին տեղեկությունը փախանցվել է Հայաստանի քննչական կոմիտեի Արագածոտնի մարզային քննչական վարչություն, որտեղից ժամանել է քննչական խումբը: Ոստիկաններն ու քննիչները նշված կիսակառույց շենքում հայտնաբերել են Սասունիկ գյուղի բնակիչ, 83-ամյա Լենիկ Խաչատրյանի կիսաքայքայված դին: Դատաբժշկի նախնական եզրակացության համաձայն` դիակի վրա բռնության հետքեր չկան: Ֆոտոլրագրողի տեղեկություններով` Լ. Խաչատրյանը այս տարվա հունվարի 8-ից որպես անհայտ կորած որոնվում էր ոստիկանաության Աշտարակի բաժնի կողմից, իսկ նրա անհայտ կորելու փաստով Արագածոտնի մարզային քննչական վարչությունում հարուցվել էր քրեական գործ` ՀՀ քր. օր.-ի 104 հոդվածի 1-ին մասի (սպանություն) հատկանիշներով: ֆոտոլրագրողը հայտնում է, որ առաջին իսկ պահից ոստիկանների, փրկարարների հետ է եղել Սասունիկի գյուղապետ Արման Մարգարյանը: Դին փրկարարներն ու ոստիկանները տեղափոխել են մեծ դժվարությամբ, քանի որ նշված հատվածը անանցանելի էր: