Ինչ որոշում կայացվեց

Իշխող կոալիցիան Հայաստանի 4-րդ նախագահի պաշտոնում պաշտոնապես կառաջադրի Արմեն Սարգսյանի թեկնածությունը: Այս մասին, այսօր՝ փետրվարի 23-ին, ԱԺ-ում կոալիցիոն գործընկերներ ՀՀԿ-ի և ՀՅԴ-ի հետ Արմեն Սարգսյանի հանդիպումից հետո լրագրողների հետ զրույցում նշեց ԱԺ ՀՅԴ խմբակցության քարտուղար Աղվան Վարդանյանը: «Պարոն Արմեն Սարգսյանը կարճ ելույթով հանդես եկավ, ներկայացրեց իր պատկերացումները ոչ միայն նախագահի պաշտոնում իր գործունեության, այլև 21-րդ դարի այս փուլում Հայաստանի զարգացման ուղղությունների, մեր երկրի առջև ծառացած մարտահրավերների, երիտասարդության առաքելության վերաբերյալ»,- հայտնեց պատգամավորը: Աղվան Վարդանյանը տեղեկացրեց, որ արդեն իսկ նախագահի ՀՀԿ թեկնածուին առաջադրելու համար անհրաժեշտ ստորագրությունները հավաքում են, շուրջ 60 ստորագրություն է հավաքվել. «Մեխանիզմն այնպիսին է, որ առաջադրում են երկու խմբակցությունների պատգամավորները: Այս որոշումը կայացվեց: Արդեն ստորագրությունները հավաքվում են, մոտ 60 ստորագրություն հավաքված է: Ովքեր Հայաստանում են, բոլորն այսօր կստորագրեն: Անհրաժեշտ էր ընդամնեը ¼-ի ստորագրությունը, սակայն արդեն սպասվածից երկու անգամ ավելի ստորագրություն կա»: Աղվան Վարդանյանը չհամաձայնեց այն տեսակետի հետ, թե Սահմանադրական փոփոխություններից հետո հանրապետության նախագահից ոչինչ կախված չէ: