Ակտիվացել է Տունգուրաուա հրաբուխը

Էկվադորում Տունգուրաուա հրաբուխը դարձյալ մոխիր եւ ծուխ է արտանետել երկինք մի քանի հրե ժայթքման ընթացքում: 5000 մ-ից քիչ ավելի բարձրություն ունեցող լեռը երկրի մայրաքաղաք Կիտո քաղաքից  135 կմ հեռավորության վրա է: Հրաբուխն արթնացել է 1999-ին: 2006-ին դրա ժայթքումը մարդկային զոհերի պատճառ էր դարձել.  4 մարդ զոհվել է, երկուսը` անհետ կորել: Անցյալ տարվա նոյեմբերին տեղի բնակիչներին նորից ստիպված են եղել տարհանել հրաբխի ակտիվության հետեւանքով: Ներկայիս մեծացած ակտիվությունն արձանագրվել է փետրվարի  27-ին. տեղի բնակիչները ստորգետնյա ցնցումներ են զգացել: Մարտի 2-ին Տունգուրաուան սկսել է ժայթքել: Էկվադորի իշխանությունները վտանգի նարնջագույն մակարդակ են հայտարարել: Հրաբխագետների տվյալների համաձայն, մոխրի եւ ծխի սյունը վերջերս 4 հազար մետր բարձրության է հասել: Մոխիրը նստում է մոտակայքի գյուղերի վրա: Մարդիկ ստիված են փողոց դուրս գալիս դիմակ կրել: Էկվադորցի ֆերմեր Խոսե Մորոչոյի խոսքով՝ նախօրեին երեկոյան երկիրն աննախադեպ կերպով հարձակվել է իրենց վրա:  «Մեզ վրա մինչեւ լուսաբաց մոխիր էր լցվում: Մենք գնալու տեղ չունենք, այնպես որ ստիպված ենք համակերպվել իրերի նման դրվածքին»: Նշենք, որ կեչուա հնդկացիների լեզվով, Տունգուրաուան «հրե կոկորդ» է նշանակում: Դա Էկվադորի մայրցամաքային հատվածի 84 գործող հրաբուխներից մեկն է։