Ով է «Քարերի սիմֆոնիա»-ի մոտ օբյեկտ կառուցում
Բնապահպանության նախարար Արծվիկ Մինասյանն այսօր լրագրողների հետ զրույցում ասաց, որ Գառնիի քարերի սիմֆոնիայում շինարարությունը կասեցված է: «Երեկվանից քայլեր են ձեռնարկվում, այնտեղ կասեցված է որևէ գործողություն շինարարության տեսքով մինչև հստակ պարզվեն բոլոր հիմքերը»,- ասաց նա: Նախարարի խոսքով, քարերի սիմֆոնիան կամ բազալտե երգեհոնը համարվում է բնության հուշարձան եւ ընդամենը մի քանի ամիս առաջ են հաստատվել այս հուշարձանի սահմաններն ու անձնագիրը, ինչպես նաև ուսումնասիրություն է կատարվում, թե արդյոք այդ աշխատանքները գտնվում են սահմանների մեջ, թե ոչ: «Ներկայումս ուսումնասիրություն է կատարվում՝ արդյոք այն գտնվում է սահմանների մեջ, թե՞ ոչ: Նույնիսկ եթե սահմանների մեջ չի, ապա գտնվում է գետի անմիջական հարեւանությամբ, դա նշանակում է, որ գետի սանիտարական գոտու օրենսդրությամբ նախատեսված պահանջներ կան:Երկրորդ, այդ տարածքն ամբողջությամբ գտնվում է համայնքի վարչական սահմաններում: Մենք դեռևս մեկ տարի առաջ առաջ էինք քաշում այն մոտեցումը, որ Քարերի սիմֆոնիան՝ որպես բնության հատուկ պահպանվող տարածք, հանձնենք կառավարման Խոսրովի անտառ արգելոցին, որպեսզի պահպանության ռեժիմն ուժեղացվեր Երրորդ՝ ցանկացած գործողություն, որը բնության հատուկ պահպանվող տարածքին կարող է սպառնալիք հանդիսանալ, լիազորված մարմինը կարող է, իրավասու է ձեռնարկելու կանխարգելիչ, կասեցնող եւ խախտումը վերացնող գործողություն»,- հայտարարեց Արծվիկ Մինասյանը: Նշենք, որ բնապահպանական տեսուչները կատարել են ուսումնասիրություն Գառնիի կիրճում գտնվող «Քարերի Սիմֆոնիա»-ի տարածքում և փաստել, որ փայտե տաղավարը կառուցվում է հուշարձանից 12 մետր հեռավորության վրա, որը հանդիսանում է սեփական տարածք: ՀՀ ԲՆ աշխատակազմի տեղեկատվության և հասարակայնության հետ կապերի վարչության պետ Արմեն Վարդանյանն էլ հայտարարել է, որ անձը սեփականության իրավունք ստացել է դեռևս 2008 թվականին: Իսկ համացանցում շրջանառվող լուսանկարը այնպիսի տպավորություն է ստեղծում, որ շինությունը գտնվում է հենց «Քարերի Սիմֆոնիա» հուշարձանի տարածքում: Հունվարի 22-ին «Ֆեյսբուք» սոցիալական ցանցի օգտատերերը ահազանգել էին բնական հուշարձան համարվող Գառնիի կիրճում գտնվող «Քարերի սիմֆոնիա»-ի մոտ շինարարական աշխատանքի մասին: Նրանք լուսանկարներ էին տարածել և նշել, որ տեղյակ չեն, թե ովքեր են կառուցողները, և, ընդհանրապես, ինչ է կառուցվում բնական հուշարձանի տարածքում: Գառնիի համայնքապետարանի աշխատակազմի քարտուղար Վարդան Մարտիրոսյանը նշեց, համայնքի բնակչի սեփականություն հանդիսացող տարածքում ոչ հիմնական շինություն է կառուցվում` փայտից տաղավարներ, որը «Քարերի Սիմֆոնիա»-ի դիմացի ճանապարհի մյուս կողմում է գտնվում:
Հետևեք մեզ Viber-ում
