«Բուհի կառավարման խորհուրդը հաստատում է վարչապետը». Անահիտ Բախշյան
Երևանի ավագանու «Ելք» խմբակցության անդամ Անահիտ Բախշյանը այսօր Ազգային ժողովում «Բարձրագույն կրթության ոլորտի օրենսդրական բարեփոխումներն ու հիմնախնդիրները» թեմայով խորհրդարանական լսումների ժամանակ ասաց, որ, երբ օրենքի նախագիծը 20 օր դրվել է «edraft»-ում քննարկման, այնտեղ գրված չի եղել, որ բուհի կառավարման խորհրդի կազմը հաստատում է վարչապետը: «Հանկարծ 20 օր քննարկումից հետո կառավարություն է գալիս մի նախագիծ, որտեղ ավելացվում է այս տողը: Հասկանալի է քաղաքական ուժի, մեծամասնության նպատակը, բայց դա ուղիղ հակասության մեջ է այն մարտահրավերին, որը դուք եկած օրվանից ասում եք՝ «ապաքաղաքականացնել բուհերի կառավարումը և ինքնավարությունը բարձրացնել»: Չի կարող բուհի ինքնավարությունը բարձրանալ, եթե վարչապետը պետք է նշանակի կառավարման խորհրդի կազմը»: Ի պատասխան՝ նախարարը պարզաբանեց. «Մասնավոր բուհի խորհուրդը պետք է հաստատվի իր հիմնադրի՝ մասնավորի կողմից, պետության կողմից հիմնադրվող բուհի խորհուրդը նույնպես պետք է հիմնադրի կողմից հաստատվի: Հիմա կարող ենք գրել՝ կառավարությունն է հաստատում, նախարարն է հաստատում, բայց հիմնադիրը պետք է խորհուրդը հաստատի, որպեսզի այն լեգիտիմ դառնա: Եթե գտնում եք, որ պետք է կազմն ընդլայնվի, որ խորհուրդը հաստատվում է կառավարության որոշմամբ, կարելի է քննարկել այդ հարցը»:
Հետևեք մեզ Viber-ում
