Արման Սահակյանը՝ դպրոցի շենքը Սամվել Ալեքսանյանի դստերը տալու մասին

Պետական գույքի կառավարման վարչության պետ Արման Սահակյանն, այսօր ամփոփելով տարին, ասաց, որ Արթիկ քաղաքում դպրոցի շենքում, որը դեռ դեկտեմբերին անհատույց հանձնվել է ԱԺ ՀՀԿ խմբակցության պատգամավոր, գործարար Սամվել Ալեքսանյանի դստեր ընկերությանը, 2 մլն դոլարի ներդրում կիրականացվի: «Դրանք ամբողջությամբ պայմանագրային հարաբերություններ են: Խնդրում եմ՝ չտարանջատենք, թե ում է հանձնված այդ գույքը, եթե կա ներդրում, եթե մարդիկ ուզում են զբաղվել բիզնեսով, ապա պետությունը պետք է խոչընդոտ չհանդիսանաՊետական գույքը տարբեր ծրագրերի ներքո տրվում է անհատույց օգտագործման: Այսինքն եթե ժամանակին անհատույց տրվել է ԿԳՆ-ին, որ այնտեղ ծրագիր իրականացնի և այլևս ծրագիր չի իրականացնում, ապա մենք դա պետք է դիտարկենք որպես պետական սեփականություն: Մենք չենք թողնում, որ պետական սեփականությունը թալանվի, օտարվի: Մենք շահագրգռված ենք, որ խոչընդոտ չլինենք բիզնեսին, մեր չօգտագործվող գույքը տանք բիզնեսին, որ մարզերում ներդրումներ իրականացնեն և աշխատատեղեր ստեղծեն»,- ասաց նա: Հիշեցնենք, որ վարչապետ Կարեն Կարապետյանը հանձնարարական էր տվել լիարժեք չօգտագործվող պետական անշարժ գույքերի վերաբերյալ: «Պետական գույքի կառավարման վարչության կողմից գույքագրվել է պետական մարմիններին, պետական ոչ առևտրային և այլ կազմակերպություններին ամրացված անշարժ գույքը, որոնց մի մասը փաստացի չի օգտագործվում կամ օգտագործվում է ոչ արդյունավետ և մասնակի: Միաժամանակ այդ գույքի սպասարկման և պահպանման ծախսերը հիմնականում իրականացվում են պետական բյուջեի միջոցներով: Այդ իսկ պատճառով նման տեսակի գույքը ներդրումային ծրագրերի իրականացման, նոր աշխատատեղերի ստեղծման նպատակով հարկավոր է օգտագործման տրամադրել, նույնիսկ՝ անհատույց, կամ նախաձեռնել դրանց օտարման գործընթացը»,- նշվում է կառավարության տարածած հաղորդագրության մեջ: