«Խնդիրը չեք լուծում, բայց բյուջեում առաջացնում եք մոտ 15-16 մլրդ դրամի ճեղքվածք». Խոսրով Հարությունյան

Ազգային ժողովում ընթանում է ԵԼՔ խմբակցության նախաձեռնած արտահերթ նիստը՝ «Հարկային օրնսգրքում փոփոխություններ եւ լրացումներ կատարելու մասին» օրենքի նախագծի վերաբերյալ: Նիստի սկզբում հիմնական զեկուցմամբ հանդես եկավ ԵԼՔ խմբակցության ղեկավար Նիկոլ Փաշինյանը՝ նշելով, որ Հայաստանում 2017-ին գնաճը կազմել է ոչ թե 2.6 տոկոս, ինչպես կառավարությունն է հայտարարում, այլ առնվազն 21.9 տոկոս: Սակայն նրան հակադարձեց Տնտեսական հարցերի մշտական հանձնաժողովի նախագահ Խոսրով Հարությույանը՝ նշելով, որ գնաճի պատճառը ակցիզային դրույքաչափի բարձրացումն է: Նա նշեց, որ դեռևս ակցիզային հարկի բարձրացումից առաջ՝ 2017 թվականին, թանկացել էին պարենային մթերքները. Ըստ նրա՝ սեղմված գազի ակցիզը թանկացել է, բայց տրանսպորտի գները չեն բարձրացել, նույնպես բենզինը չէր կարող բերել առաջին անհրաժեշտության պարենային ապրանքների գների բարձրացման, իսկ դիզվառելիքի թանկացումը, անշուշտ, կազդի գյուղմթերքի վրա, բայց կառավարությունը կոմպենսացնում է այդ բարձրացումը, առավել ևս՝ հունվարին այդ ազդեցությունը չէր կարող լինել։ Իսկ ակցիզային դրույքաչափի իջեցումը բյուջեում կառաջացնի 16.7 մլրդ դրամի ճեղքվածք։ «Խնդիրը չեք լուծում, բայց բյուջեում առաջացնում եք մոտ 15-16 մլրդ դրամի ճեղքվածք, և այս օրենսդրական նախաձեռնության գինը բյուջեի համար առնվազն 32-33 մլրդ է: Մեր խնդիրը պետք է լինի՝ սոցիալապես նվազ կարողություններ ունեցող հատվածի տնօրինվող գումարն ավելացնել այնքան, որ նրանք կարողանան այդ 21.9% գնաճը դիմագրավել»,- ասաց Հարությունյանը: