«Աթեշյան սրբազանը չափն անցել է». Տիրան Լոքմագյոզյան (video)

«Արամ Աթեշյանն ընդհանրապես չի կարող փոխանորդ լինել. նրան պատրիարքը չի ընտրել, այլ պետությունն է նշանակել»,- այսօր Հայելի ակումբում ասաց թուրքագետ Տիրան Լոքմագյոզյանը: Հիշեցնենք, որ օրերս Պոլսո պատրիարքարանի հոգևոր խորհրդի արտահերթ ժողովի ընթացքում որոշվել է, որ Արամ արքեպիսկոպոս Աթեշյանը կշարունակի մնալ Պոլսո Հայոց պատրիարքի փոխանորդի պաշտոնում: Նման որոշման կրոնական ժողովը հանգել է Ստամբուլի նահանգապետարանում Թուրքիայի ներքին գործերի նախարար Սուլեյման Սոյլուի և պատրիարքի ընտրությունների կազմակերպմամբ զբաղվող նախաձեռնող խմբի անդամների ու հայ համայնքի հիմնադրամների ղեկավարների մասնակցությամբ արտահերթ ժողովից հետո: Թուրքագետի կարծիքով Պոլսո աթոռի իրական ղեկավարը Գարեգին Բեկչյան սրբազանն է, ով ընտրվել է հայաստանյան եկեղեցու բոլոր կանոններով. «Պոլսո աթոռը բոլոր օրենքներով պահում է Բեկչյան սրբազանը»: Տիրան Լոքմագյոզյանը պնդում է, որ ոչ մի արտահերթ ժողով տեղի չի ունեցել, պարզապես հավաքվել են նախաճաշի սեղանի շուրջ ու որոշում կայացրել. «Զեկույցում նշվում է՝ նախաճաշի սեղանի շուրջ հավաքվել են մի քանի հոգևորականներ և որոշում կայացրել: Իրականում քվորում էլ չի եղել, հետևաբար՝ որոշումն ընդունվել է եկեղեցու կանոնները խախտելով»: Իսկ ի՞նչ կարող է Մայր Աթոռն անել իրավիճակը շտկելու համար, թուրքագետի կարծիքով իրականում բարդ իրավիճակ է ստեղծված, քանի որ Պոլսո պատրիարքարանն անկախ է և անգամ կարող է հայտարարել, որ չի ճանաչում Էջմիածնի կաթողիկոսարանը: Առավել մանրամասն՝ տեսանյութում.