Ստեփանակերտի ծննդատանը մահացած նորածինը ծնվել է բազմաթիվ արատներով. տնօրեն

Ստեփանակերտի ծննդատանը մահացած նորածինը ծնվել է բազմաթիվ արատներով։ Այս մասին ասաց Ստեփանակերտի «Մոր և մանկան պահպանման կենտրոն» ՓԲԸ-ի տնօրեն Վարդգես Սերոբի Օսիպովը,անդրադառնալով Tert.am-ի այն հրապարակմանը, որ Ստեփանակերտի ծննդատանը նորածին է մահացել, իսկ հարազատների խոսքով՝ ծննդկանը մինչ ծննդաբերելը խնդիրներ չի ունեցել։ «Հերմինե Մարդյանը ծնվել է 1990թ. Մարտակերտի շրջանի Մոխրաթաղ գյուղում: Ծննդականը հաշվառված էր Արցախի առողջապահության նախարարության Մարտակերտի շրջանային բուժմիավորումում: Դիմել է Ստեփանակերտի Մոր և մանկան առողջության պահպանման կենտրոնի կանանց կոնսուլտացիա, որտեղ կատարվել է մանկաբարձ-գինեկոլոգի և այլ մասնագետների՝ մասնավորապես էնդոկրինոլոգի խորհրդատվություն, այնուհետև ուղեգրվել է նույն կենտրոնի բարձր ռիսկի հղիների բաժանմունք՝ «Հղիություն երկրորդ, 33 շաբաթական, գլխային առաջադրություն, թեթև աստիճանի պրէէկլամպսիա, հեստացիոն դիաբետ (հղիների շաքարային դիաբետ), երրորդ աստիճանի ճարպակալում: Բարդացած գինեկոլոգիական անամնեզ» ախտորոշմամբ»,-ասաց Օսիպովը։ Նա տեղեկացրեց,որ առաջին հղիությունը 2017 թ. ընդհատվել էր 8-9 շաբաթականում չզարգացող հղիության պատճառով: Ինչ վերաբերում է երկրորդ հղիությանը,ապա Օսիպովն ասաց,որ Հերմինե Մարդյանը ծննդաբերել է անհաս նորածին.«Ծննդաբերել է արական սեռի, ծանր ասֆիկսիայով, բազմաթիվ արատներով երեխա,որոնք կյանքի հետ անհամատեղելի էին: Նորածինը մոտ 11 ժամ հետո մահացել է: Կատարված պաթանատոմիական հետազոտության ընթացքում հաստատվել է ներքին օրգանների զարգացման բազմաթիվ արատներ՝ սրտի, աղիների և հետանցքի բացակայություն»։