Հումոր ե՞ն անում

ԱԺ-ում «Աջակողմյան ղեկային տեղաբաշխմամբ տրանսպորտային միջոցների ներմուծումը ժամանակավոր արգելելու մասին» օրենքի նախագծի քննարկման ժամանակ  ՀՀ ԱԺ «Ելք» խմբակցության պատգամավոր Արտակ Զեյնալյանը հարցրեց, թե աջակողմյան ղեկով մեքենաների շահագործման արգելքը տնտեսակա՞ն նպատակ ունի, թե՞  հակաքայլ է Ճապոնիայից ներկրվող մեքենաների դեմ: «Աջակողմյան ղեկով մեքենաները 10 տարով ավելի թարմ են, քան ձախակողմյան ղեկով մեքենաները, որովհետև Հայաստանը մեքենա չի արտադրում, և մարդիկ ավտոմեքենաները ներկրում են: Եթե Ճապոնիայից են ներկրում, ապա այն 10 տարով ավելի թարմ է և 5 անգամ ավելի անվտանգ, քան Գերմանիայից ներմուծված՝ արդեն բարոյապես և ֆիզիկապես մաշված մեքենաները: Իրական պատճառը ո՞րն է այս նախաձեռնության», - նշեց Զեյնալյանը։ Պատգամավորը խնդրեց հիմնական զեկուցող ՀՀ տրանսպորտի, կապի և տեղեկատվական տեխնոլոգիաների փոխնախարար Գագիկ Գրիգորյանին հստակեցնել, եթե աջակողմյան ղեկով մեքենայի սեփանականտերը մեքենայի ձախ հայելու վրա տեսախցիկ է տեղադրել, կարող է արդյոք մեքենան անարգել վարել Հայաստանում։ «Եթե ձևափոխումները կլինեն այն մեքենաների վրա, որոնք արդեն իսկ շահագործվում են և գրանցված են, ապա ոչ մի խնդիր չկա, իսկ տնտեսական պայքարի մասով, կարծում եմ՝ դա հումոր էր ու դրան պատասխանելու կարիք չկա: Իսկ ինչ վերաբերվում է Ճապոնիային, ապա այն մեքենաները, որ մաշվում են և ունեն էկոլոգիական խնդիրներ, շատ արագ դուրս են հանում երկրից և վաճառում այն երկրներին, որտեղ այն շահագործելու իրավասությունը կա», - արձագանքեց փոխնախարարը։