Էրդողանը կոչ արեց ամերիկյան զորքերին հեռանալ Մանբիջից (տեսանյութ)

Թուրքիայի նախագահ Ռեջեփ Էրդողանը քննադատել է ԱՄՆ-ի դերը Սիրիայի հակամարտությունում՝ պահանջելով, որ ամերիկյան զորքերը լքեն սիրիական Մանբիջ քաղաքը, որը գտնվում է քրդական զորամիավորումների վերահսկողության ներքո: «Ինչու՞ են ամերիկյան զորքերն այնտեղ: Հեռացեք այստեղից: Ո՞վ է ձեզ հրավիրել այստեղ: Ժողովրդական ինքնապաշտպանության ջոկատնե՞րը, Քրդական աշխատավորական կուսակցությու՞նը: Դուք եք վերջիններիս այնտեղ բերել ու այժմ մեզ ասում եք չմոտենալ Մանբիջին: Մենք կգանք Մանբիջ և այդ տարածքը կվերադարձնենք իրական տերերին: Դա է մեր տարբերությունը»,- հայտարարել է Էրդողանը: Թուրքիայի նախագահն ընդգծել է, որ ԱՄՆ-ը գործում է Թուրքիայի, Իրանի ու հավանաբար Ռուսաստանի շահերի դեմ հյուսիսային Սիրիայում: «Դա նշանակում է, որ դուք ունեք ծրագրեր Թուրքիայի, Իրանի, ինչու ոչ՝ Ռուսաստանի դեմ: Մենք սակայն չենք փոխելու դիրքորոշումը»,- հավելել է Էրդողանը: Հիշեցնենք, որ սիրիական Աֆրինում քրդական զորամիավորումների դեմ Թուրքիայի ձեռնարկած գործողությունների արդյունքում աճել է լարվածությունը Անկարայի ու Վաշինգտոնի միջև: Վերջինս աջակցում է քրդական զորամիավորումներին Դաեշ-ի դեմ պայքարում: Չնայած դրան ՝ Թուրքիան այս զորամիավորումները դիտարկում է որպես ահաբեկչական կառույցներ եւՔրդական աշխատավորական կուսակցության մի մաս