«Կոշիկը թանկացել է, ոտքով գնալն էլ դժվարանում է»

«Մոսկվա» կինոթատրոնի հրապարակից քիչ առաջ մեկնարկեց «ԵԼՔ » դաշինքի երկրորդ հանրահավաք-երթը՝ ընդդեմ թանկացումների: Պատգամավոր Էդմոն Մարուքյանը մինչ ելույթներին անցնելը կոչ արեց սպասել աշխատավորներին՝ նշելով, որ նախորդ երթից հետո բազմաթիվ նամակներ են ստացել, որ աշխատող մարդիկ ևս ցանկանում են մասնակցել հավաքին: Էդմոն Մարուքյանը հայտարարեց, թե թանկացումների վերաբերյալ խորհրդարանական լսումները իրականում ոչ թե գնաճը մեղմեցին, այլ դարձան «ձեռառնելիք». «Դա ծիծաղելի մի միջոցառում էր, որի ժամանակ, օրինակ, հայտարարվեց, որ գիտնականները պարզել են, որ կարագն ավելի օգտակար է, քան ձեթը, դա է պատճառը, որ կարագը թանկացել է»։ Նա նաև հիշեցրեց, որ նախորդ՝ հունվարի 19-ի երթից հետո իշխանությունները հրավիրեցին լսումներ: Պատգամավորի խոսքով՝ թանկացումների վերաբերյալ պաշտոնյաների ներկայացրած պատճառներն ու այլ երկրների համեմատություններն իրականության հետ որևէ կապ չունեն։ «Ասում են՝ բենզինը թանկացել է, գազով, երթևեկեք, գազը թանկացել է, ոտքով երթևեկեք. հումորային բան է առաջացել, որ ասում են՝ կոշիկն էլ է թանկացել, ոտքով գնալն էլ է դժվարանում: Այս ամենը խոսում է այն մասին, որ մենք ունենք ոչ ադեկվատ, քաղաքացու իրական կյանքից կտրված իշխանություններ, և այդ իշխանություններին քաղաքացիները պետք է իրենց համախմբվածությամբ, այս մոբիլիզացիայի, պրոցեսների արդյունքում ցույց տան իրենց տեղը»,-ասաց նա և նշեց, որ «Ելք» դաշինքը պատրաստել է Հարկային օրենսգրքի փոփոխությունների նախագիծ: