Գիշերը կոնյակ խմելով՝ երեք ժամում 14 երգ գրեցինք. Վախթանգ Կիկաբիձե
«Հայկական ժամանակ»-ը զրուցել է Ալեքսեյ Հեքիմյանի ծննդյան 90-ամյակին նվիրված հոբելյանական համերգի մասնակից, հայտնի դերասան, երգիչ, և կոմպոզիտոր, Վախթանգ Կիկաբիձեի հետ: Մեզ հետ զրույցում Կիկաբիձեն պատմեց, թե ինչպես են Հեքիմյանի հետ ծանոթացել և մի գիշերում 14 երգ գրել: «Շատ հետաքրքիր էր, Թբիլիսիում ինձ զանգահարեց Վրաստանի «ԿԳԲ-ի նաչալնիկը» և ինձ ասաց, որ եկել է Մոսկվայի քրեական հետախուզության պետ Ալեքսեյ Հեքիմյանը և ինձ համար 14 երգ է բերել: Ես էլ այդ մարդկանց չեմ սիրում, հատկապես ոստիկաններին»,- պատմում է երգիչը, ասելով՝ որ դժվարությամբ է համաձայնվել: «Գիշերը կոնյակ խմելով՝ երեք ժամում 14 երգ գրեցինք, խելագարվել կարելի է»: Վախթանգ Կիկաբիձեն ցավով հիշելով ընկերոջ՝ Ալեքսեյ Հեքիմյանի կորուստը, ասաց, որ այժմ ինքն է գրում իր երգերը. «Նրանք, ում հետ աշխատել եմ, հիմա շատերն արդեն չկան, իսկ ովքեր էլ կան, հասկանալի չէ, թե որտեղ են ապրում: Չեմ կարողանում գտնել մեկին, ով գրի այն, ինչ ինձ հետաքրքրում է: Մեր այն հարցին՝ արդյո՞ք հիմա էլ է Կիկաբիձեն նույն կարծիքին՝ ինչ տարիներ առաջ էր, երբ ասում էր, որ առանց կինո կարող է ապրել, բայց առանց երգի՝ ոչ, հայտնի երգիչը պատասխանեց. «Եթե ասեն, որ էլ երգել չես կարող, ոչինչ չես փոխի, ոչ մի տեղ չես փախչի, բայց ինձ դեռ չեն ասում», -ասաց արվեստագետը, հավելելով, որ այո, առանց ֆիլմի կարելի է, բայց առանց երաժշտության՝ ո՛չ: Վախթանգ Կիկաբեձեն, խոսելով իր հետագա ծրագրերի մասին, ասաց, որ նոր ֆիլմ է նկարում «Վրաստանի ախտորոշում» անվանումով կատակերգություն, «ֆիլմն ամեն ինչի մասին է՝ պատերազմի, հարևան երկրների, ընկերների, փիլիսոփայական ֆիլմ է, բայց ծիծաղելի տրագիկոմեդիա»: «Հայկական ժամանակ»-ի այն հարցին, թե ինչպես է գնահատում հայ-վրացական հարաբերությունները մշակույթի ոլորտում, Կիկաբիձեն ասաց, որ կա ինֆորմացիայի երկկողմանի պակաս: «Շատ կարևոր է, որ համերգներ, միջոցառումներ շատ լինեն, իսկ էնպես, մենք եղբայր երկրներ ենք, ինչի՞ մասին կարող է խոսք լինել»: Արվեստագետից հետաքրքրվեցինք, թե արդյո՞ք տեղյակ է, որ Վրաստանի նախկին նախագահ Միխեիլ Սաակաշվիլու «Ուժերի զարթոնք» գրքի թարգմանության շնորհանդեսը Հայաստանում արդեն երկրորդ անգամ է՝ ինչ մերժվում է, վերջինս ասաց, որ քաղաքականության մասին չի խոսելու և հրաժարվեց պատասխանից: Կիկաբիձեն զայրացած հայտարարեց, որ Սաակաշվիլիին շուտով կձերբակալեն:
Հետևեք մեզ Viber-ում
