Ճիշտ 4 տարի առաջ Ֆիդել Կաստրոյի, այսօր ինքնասպան եղած, որդին Հայաստանում էր

4 տարի առաջ՝ 2014 թվականի մարտի վերջերին օրերին էր, Կուբայի նախկին առաջնորդ Ֆիդել Կաստրոյի ավագ որդին՝ գիտությունների դոկտոր, Կուբայի գիտության հարցերով պետական խորհրդական Անխել Կաստրո Դիաս Բալարտը ՀՀ ԿԳ նախարարի հյուրն էր: Հանդիպումը ես էի լուսաբանում: Պաշտոնական հանդիպումից հետո պարոն Կաստրոյի հետ նաև հարցազրույց արեցի, որտեղ խոսեցինք տարբեր հարցերի մասին: Ցավոք hajeli.am-ի արխիվային նյութերը տեխնիկական պատճառներով այս պահին հասանելի չեն: Ինձ հաջողվեց գտնել ընդամենը մի փոքր հատված այդ հարցազրույցից, որը մեջբերում եմ բառացի. «Ես Մոսկվայում էի գտնվում, Հայաստանի գիտության պետական կոմիտեի նախագահից՝ պարոն Հարությունյանից հրավեր ստացա և եկա: Գլխավոր նպատակս` համատեղ ծրագրեր իրականացնելու հնարավորություն գտնելն է գիտության և բարձրագույն կրթության ոլորտներում: Ես հանդիպում եմ ունեցել կրթության և գիտության նախարարի, ակադեմիայի և գիտության կոմիտեի նախագահների հետ: Կարծում եմ, որ իմ այցը օգտակար կլինի հետագա համագործակցության համար»: «Ես բավականին հեռու եմ հորս գործից, ես քաղաքական գործիչ չեմ, ֆիզիկոս եմ՝ գիտնական: Ես, իհարկե, քաղաքականությամբ զբաղվում եմ այնքանով, որ Կուբայի գիտության հարցերով պետական խորհրդականն եմ: Բայց իմ հետաքրքրությունները այլ են, ես ու հայրս շատ տարբեր ենք այդ առումով»: Հիշում եմ նաև, որ հարցազրույցում Կաստրո կրտսերը պատմեց իր հոր և Անաստաս Միկոյանի մտերմության մասին: Ասում էր, որ հայրը շատ հարգանքով էր վերաբերում Միկոյանին: Այս լուսանկարն արվել է հանդիպումից անմիջապես հետո: Այսօր, երբ իմացա Անխել Կաստրո Դիաս Բալարտի ողբերգական մահվան մասին, դժվարանում էի հավատալ, որովհետև այդ հսկա մարդու մեջ այն ժամանակ ահռելի մեծ ուժ և գիտնականին բնորոշ լայն մտածողություն էի տեսել: Երևի կյանքն իսկապես շատ անբացատրելի շրջադարձեր ու անսպասելի կրիտիկական կետեր ունի:  Կարինե Սարիբեկյան