Գերմանիայի շուրջ հազար կայարանում սխալմամբ տարհանում է հայտարարվել

Ուրբաթ օրը Գերմանիայի երեք դաշնային հողերի՝ Հեսսենի, Ռայնլանդ-Պֆալցի և Սաարի երկաթուղային կայարաններում ուղևորներին անսպասելիորեն խնդրել են լքել տարածքը։ Կեղծ ահազանգը կարող է ազդած լինել մոտ հազար կայարանի և կանգառի վրա, ստույգ թիվն առայժմ հայտնի չէ։ Այս մասին հայտնում է BILD ֊ը;

Հայտարարությունը, ի թիվս այլոց, հնչել է նաև Մայնի Ֆրանկֆուրտի կենտրոնական կայարանում: Կարճ ժամանակ անց ուղևորներին տեղեկացրել են, որ վտանգ չկա:

Միջադեպի պատճառը դեռևս պարզված չէ։ Դաշնային ոստիկանությունը հայտնել է, որ Deutsche Bahn-ի աշխատակիցը պատահաբար սխալ կոճակ է սեղմել: Երկաթուղային ընկերության ներկայացուցիչն իր հերթին որպես պատճառ նշել է հայտարարությունների ավտոմատացված համակարգի տեխնիկական խափանումը:

Deutsche Bahn-ը ներողություն է խնդրել ուղևորներից տեղի ունեցած սխալի համար: