ԱՄՆ Գաղտնի ծառայության ղեկավարի տեղակալը պաշտոնից հեռանում է մեկուկես տարվա աշխատանքից հետո

ԱՄՆ Գաղտնի ծառայության տնօրենի տեղակալ Մեթ Քուինը մեկուկես տարվա պաշտոնավարումից հետո հայտարարել է հեռանալու մասին։ Պաշտոնյայի վերջին աշխատանքային օրը կլինի նոյեմբերի 7-ը։ Իր որոշումը նա բացատրել է ընտանիքին ավելի շատ ժամանակ հատկացնելու ցանկությամբ, հաղորդում է The Hill-ը։

Ուրբաթ օրը X սոցիալական ցանցում հրապարակված հայտարարության մեջ Քուինը նշել է, որ Գաղտնի ծառայության տնօրեն Շոն Քարանի հետ արդեն մի քանի ամիս է՝ նախապատրաստում է լիազորությունների փոխանցման գործընթացը։ Գերատեսչության աշխատակիցներին ուղղված նամակում նա վերջին 18 ամիսներն իր կարիերայի ամենանշանակալի շրջանն է անվանել և խոստովանել, որ հեռանալու որոշումն իրեն հեշտ չի տրվել։

Քուինը Գաղտնի ծառայությունում աշխատել է ավելի քան 20 տարի, այնուհետև անցել թոշակի, սակայն ավելի ուշ վերադարձել է համակարգ ու ստանձնել տնօրենի տեղակալի պաշտոնը։ Նրա խոսքով՝ իր վերադարձն ի սկզբանե երկարաժամկետ չէր նախատեսված. նա անմիջապես զգուշացրել էր Քարանին, որ մտադիր է հնարավորինս արագ իրեն փոխարինող պատրաստել։

Պաշտոնյան վստահություն է հայտնել, որ կառույցը պատրաստ է հետագա աշխատանքին, և ընդգծել է ծառայողական առաջխաղացման վաղեմի ավանդույթը։ Ըստ նրա՝ իր վերադարձի նպատակներից մեկն այն էր, որ Գաղտնի ծառայությունը հետագայում ևս կարողանա տնօրենի տեղակալ նշանակել սեփական կադրերի շարքից՝ առանց դրսից թեկնածուներ փնտրելու։ Քուինը կարծում է, որ այդ նպատակին հաջողվել է հասնել։ Թե ով կզբաղեցնի նրա պաշտոնը, առայժմ չի հաղորդվում։

Այս շաբաթ ավելի վաղ Քուինը Քարանի հետ հարցազրույց էր տվել CBS News հեռուստաալիքի «60 րոպե» հաղորդաշարին՝ պատմելով Գաղտնի ծառայության պահպանության տակ գտնվող անձանց հասցեին հնչող սպառնալիքների աճի մասին։ Հուլիսին գերատեսչության տնօրենը հայտնել էր, որ ծառայությունը սպառնալիքների առնչությամբ սկսել է ավելի քան 10 հազար հետաքննություն, ինչը մոտ 40%-ով գերազանցում է նախորդ տարվա նույն ժամանակահատվածի ցուցանիշը։

Անդրադառնալով ԱՄՆ նախագահ Դոնալդ Թրամփի հասցեին ուղղված սպառնալիքներին՝ Քուինը որպես գլխավոր գործոններից մեկն առանձնացրել է հոգեկան առողջության հետ կապված խնդիրները։ Նրա խոսքով՝ գնալով ավելի շատ մարդիկ են հայտնվում ծայրահեղ հուզական լարվածության մեջ։

Քուինի հրաժարականը համընկել է Թրամփի վարչակազմում տեղի ունեցող կադրային այլ փոփոխությունների հետ։ Ուրբաթ օրը Սպիտակ տունը հայտնեց մամուլի քարտուղար Քեթի Զախարիայի հեռանալու մասին, որն այդ պաշտոնում աշխատեց ընդամենը հինգ օր։ Իսկ երեքշաբթի օրը հրաժարական էր տվել Հունաստանում ԱՄՆ նախկին դեսպան Քիմբերլի Գիլֆոյլը։ Դա տեղի է ունեցել այն բանից հետո, երբ Թրամփը նրան խնդրել էր թողնել պաշտոնը Հանրապետական կուսակցության հովանավորներից մեկի հետ ունեցած կապերի շուրջ բարձրացած քննադատության ֆոնին։