Դատախազը Վեհափառի եղբոր և եղբորորդու համար ազատազրկում է պահանջել

Արմավիրի մարզի ընդհանուր իրավասության դատարանում՝ դատավոր Գևորգ Մանուկյանի նախագահությամբ, այսօր շարունակվել է Ամենայն Հայոց Կաթողիկոսի եղբոր՝ Գևորգ Ներսիսյանի և եղբորորդու՝ Համբարձում Ներսիսյանի գործով դատաքննությունը։ Նախորդ նիստում դատարանը նրանց մեղավոր էր ճանաչել նախընտրական քարոզչությանը խոչընդոտելու համար։

Հոկտեմբերի 15-ի նիստում հանրային մեղադրողը միջնորդել է Գևորգ Ներսիսյանին դատապարտել 3 տարի 6 ամիս ազատազրկման՝ հաշվակցելով անազատության մեջ անցկացրած ժամանակահատվածը։ Համբարձում Ներսիսյանի համար պահանջվել է 4 տարի 6 ամիս ազատազրկում, իսկ նախորդ դատավճռով չկրած պատժի միավորմամբ՝ վերջնական 7 տարի 6 ամիս ազատազրկում։

Մեղադրողը նաև առաջարկել է անփոփոխ թողնել ամբաստանյալների նկատմամբ կիրառված խափանման միջոցները՝ մինչև դատավճռի օրինական ուժի մեջ մտնելը։

Հիշեցնենք, որ քրեական վարույթը նախաձեռնվել է «Հանրապետություն» կուսակցության՝ Վաղարշապատի համայնքապետի թեկնածու Հարություն Մկրտչյանի հաղորդման հիման վրա։ Վերջինս պնդել էր, որ Ներսիսյանները խոչընդոտել են իրենց նախընտրական քարոզարշավը։ Պաշտպանական կողմը, մինչդեռ, մեղադրանքը համարում է անհիմն և ապօրինի։

Գևորգ և Համբարձում Ներսիսյանները սկզբում կալանավորված են եղել, սակայն հետագայում նրանց խափանման միջոցները փոխվել են։

Հաջորդ դատական նիստը նշանակված է հոկտեմբերի 22-ին՝ ժամը 15։00-ին։ Դատարանը կլսի պաշտպանական կողմին, որից հետո կհեռանա խորհրդակցական սենյակ՝ դատավճիռ կայացնելու։